Foto: Vıdeodan alynǵan kadr
Oblystyq densaýlyq saqtaý basqarmasynyń málimetinshe, qazirgi ýaqytta Hromtaý aýdandyq aýrýhanasynda alty naýqas em qabyldap jatyr. Olardyń biri 2009 jyly týǵan bala. Jansaqtaý bóliminde tórt adam, qalǵan ekeýi jalpy palatada jatyr. Birneshe naýqasqa ota jasalyp, barlyǵy qajetti medısınalyq kómekpen jáne dári-dármekpen qamtamasyz etilgen. Buǵan deıin aýrýhanaǵa jetkizilip, keıin úıine qaıtqan azamat ta qaıta emdeý ornyna jatqyzylǵan.
Oqıǵa ornyna kelgen Aqtóbe oblysynyń ákimi Ashat Shaharov zardap shekkender men qaza tapqandardyń týystaryna kóńil aıtyp, barlyq qajetti kómek kórsetiletinin jetkizdi.
«Biz úshin óte aýyr qaza boldy. Tańǵy saǵat 08:00–den óte osyndaı oqıǵa bolǵannan keıin barlyq tıisti memlekettik organdar óz jumysyn atqaryp keledi. Bizdiń tarapymyzdan jan-jaqty kómek uıymdastyryldy. Barlyq jaǵdaı óz baqylaýymda bolady», dedi Ashat Shaharov.
Al Áıteke bı aýdanynyń ákimi Dáýletııar Toǵyzbaevtyń aıtýynsha, apatqa ushyraǵan GAZel Aqtóbe qalasy men Áıteke bı aýdany arasynda jolaýshy tasymaldaýmen aınalysqan. Tasymaldaý qyzmeti maýsym aıynan beri resmı túrde, jeke kásipker arqyly júzege asyrylyp kelgen.
«Tańǵy 7:00–de ádettegideı aýyldan shyqqan. Salonda qalaǵa jeke sharýalarmen bara jatqan azamattar boldy. GAZel 16 oryndyq ári jańa», dedi Dáýletııar Toǵyzbaev.
Qaıtys bolǵan ár jolaýshynyń otbasyna jergilikti bılik 1 mıllıon teńgeden qarjylaı kómek bóledi.
Aıta keteıik, apattan keıin Samara — Shymkent tasjolynyń bir bóligi ýaqytsha jabyldy. Oqıǵanyń mán-jaıyn anyqtaý úshin IIM arnaıy tergeý toby jáne úkimettik komıssııa quryldy. Komıssııa Premer-mınıstr Oljas Bektenovtiń tapsyrmasymen apattyń sebepterin jan-jaqty zertteýge kiristi.
