Is-sharaǵa eldiń mádenıet pen ádebıet salasynyń kórnekti ókilderi qatysty. Sonymen qatar «Muhtar Áýezovtiń Qazaqstan mádenıeti men ádebıetiniń damýyna qosqan úlesi» taqyrybyndaǵy dóńgelek ústel uıymdastyryldy. Qatysýshylarǵa jazýshynyń nemeresi Zıfa-Álýa Áýezova beınejoldaý arqyly quttyqtaý bildirdi. Sonymen qatar kórnekti ǵalym Álkeı Marǵulannyń buryn jaryq kórmegen «Muhtar Áýezov týraly estelikter» atty eńbeginiń tusaýy kesildi.
«Bul Áýezov tárizdi sóz alybynyń rýhyna máńgilik taǵym ete berýge tıis ekenimizdi kórsetedi. Áýezovtiń aty júrgen jerdiń bári kıeli dep taǵzym ete berý lázim dep oılaımyn. Búgingi is-shara qutty bolsyn, aǵaıyn!» dedi Qazaqstannyń halyq jazýshysy Smaǵul Elýbaı.
№4 kitaphana-bólimshesi – Almaty qalasyndaǵy eń iri jáne jetekshi kitaphanalardyń biri. Kitap qory 34 000 danany quraıtyn, al jyldyq kelýshiler sany 350 000-nan asatyn kitaphanaǵa Muhtar Omarhanuly Áýezovtiń esimin berý – rýhanııat janashyrlary úshin úlken qýanysh. Qazaqstan Jazýshylar odaǵynyń tóraǵasy Mereke Qulkenov Almatynyń kúretamyry ispetti Abaı dańǵylynyń boıynda ornalasqan osynaý parasat ordasyna uly qalamgerimizdiń esimi berilýi tekten-tek emes emes ekenin aıtty.
«Bul oryn uly jazýshynyń murasyn ulyqtap qana qoımaı, ulttyq ádebıet pen mádenıetti jańa deńgeıge kóteretin rýhanı ortalyqqa aınalady. Muhtar Áýezovtiń murasy — halqymyzdyń rýhanı baılyǵynyń altyn tiregi. Osyndaı ortalyqtar bul baılyqty keler urpaqqa jetkizetin senimdi kópir bolmaq», dedi Mereke Qulkenov.
Saltanatty sharadan soń atalǵan kitaphana ǵımaratynda «Muhtar Áýezovtiń Qazaqstan mádenıeti men ádebıetiniń damýyna qosqan úlesi» atty dóńgelek ústel ótti. Dóńgelek ústeldi Muhtar Áýezov atyndaǵy Ádebıet jáne ónertaný ınstıtýtynyń dırektory Kenjehan Matyjanov júrgizdi. Jıyn barysynda M.Áýezovtiń nemeresi, shyǵystanýshy jáne túrkitanýshy Zıfa-Alýa Áýezovanyń onlaın-quttyqtaýy tyńdalyp, aqyn ári dıplomat Oljas Súleımenovtiń atynan qyzy Mádına Súleımenova sóıledi. Sonymen qatar kitaphanaǵa Murat Muhtaruly Áýezovtiń jeke kitaphanasynan kitaptardy syıǵa tartý rásimi ótti.
Muhtar Áýezov atyndaǵy kitaphananyń ashylýy Almatynyń mádenı ómirindegi eleýli oqıǵa bolmaq, ol birneshe býyndy – oqyrmandardy, jáne uly jazýshy shyǵarmashylyǵyn qadirleıtin jandardy biriktirip, jańa mádenı keńistikke aınalmaq.
Almaty
