«QazAgroQarjy» aksıonerlik qoǵamy Abaı oblysynda BAQ ókilderine arnalǵan baspasóz týr uıymdastyrdy. Jýrnalıster óńirdiń jetekshi sharýashylyqtary – Borodýlıha aýdanyndaǵy «Lada» sharýa qojalyǵy men «Zenkovskoe» JShS-niń jumysymen tanysty. Sapar barysynda aýyl sharýashylyǵy tehnıkasyn jeńildetilgen lızıng arqyly jańartý agrobıznestiń tıimdiligine qalaı áser etetini kórsetildi.
Aldymen tilshiler «Lada» sharýa qojalyǵyna bardy. 4 myń gektar alqapta bıdaı, qaraqumyq, kúnbaǵys jáne mal azyǵy daqyldaryn ósiretin sharýashylyq kúnbaǵys maıyn da óńdeıdi. Qojalyqtyń basshysy Aleksandr Romanov bul kásipti ákesinen jalǵap, otbasylyq isti damytyp otyr. «QazAgroQarjy» kompanııasymen seriktestik 23 jylǵa jalǵasyp keledi. Osy ýaqyt ishinde sharýashylyq 368 mıllıon teńgege 20-dan astam tehnıka alǵan. Onyń ishinde MTZ, Buhler traktorlary, Essil jáne Vector kombaındary bar.
«Búginde jańa tehnıka – basty qajettilik. Mysaly, Gaspardo Chrono 916 sebý mashınasy arqyly buryn úsh adam atqaratyn jumysty endi bir operator oryndaıdy», – deıdi fermer.
Kelesi aıaldama – Zenkovka aýylyndaǵy «Zenkovskoe» JShS. 5 myń gektardan astam jeri bar sharýashylyq dándi jáne maıly daqyldardy ósiredi. 45 adam turaqty jumyspen qamtylǵan. Kásiporyn basshysy Mádıjan Quramysov – agrarlar áýletiniń ókili. Ol óndiriste ǵylym men tájirıbeni ushtastyryp keledi. Bıyl sharýashylyq HORSCH Leeb búrikkishi, Bourgault sebý kesheni, John Deere traktory men Claas Trion kombaınyn alǵan. Sońǵysy – jyldyq 5% mólsherlememen lızıngke alynǵan tehnıka.
«Eger jeńildetilgen lızıng bolmasa, álemdik brendterdiń tehnıkasyn paıdalaný qıyn bolar edi. Al búgin bizdiń alqaptarda Claas Trion sııaqty zamanaýı mashınalar jumys istep júr», – deıdi sharýashylyq basshysy.
2018 jyldan beri «Zenkovskoe» JShS «QazAgroQarjy» arqyly jalpy quny 992 mln teńge bolatyn 10-nan astam tehnıka alǵan. «QazAgroQarjy» AQ Abaı oblystyq fılıalynyń dırektory Renat Bekovtiń aıtýynsha, óńir agrarııleri tehnıka lızıngine belsendi qatysyp keledi.
«2023 jyldan 2025 jylǵy 1 qazanǵa deıin biz 32 mlrd teńgege 1719 tehnıka qarjylandyrdyq. Bıyldyń ózinde oblys sharýalary 12 mlrd teńgege 452 tehnıka aldy», dedi ol.
Búginde fılıaldyń 1 090 turaqty klıenti bar. Bul – óńirde zamanaýı tehnıkany engizý men aýyl sharýashylyǵyn jańǵyrtýdyń naqty kórsetkishi.
Abaı oblysy
