«Qaırat» klýbynyń bas bapkeri Rafael Ýrazbahtın matchtan keıingi baspasóz máslıhatynda jeńiske jetip, mańyzdy úsh upaı enshileýge de múmkindik bolǵanyn aıtty.
– Qarsylas klýbtyń áleýeti joǵary, tegeýrindi ujym. Buǵan deıin grekııalyq «Olımpıakos» klýbyna qarsy oıynda da olar on oıynshymen tartysqa tústi. Bizdiń jigitterge qarsy matchta tipti 90 mınýttaı bir fýtbolshynyń kemdigin bildirmeı, qorǵanysta da, shabýylda da ábjildik tanytty. Dopqa ıelik etip, qysymdy kúsheıtip, basymdyqty ýysta ustaǵan bizdiń jigitterdiń de gol soǵatyn múmkindigi boldy. Qaqpashy Temirlan Anarbekov birneshe joıqyn soqqyny qaıtaryp sheberlik tanytty. Jalpy, ujymdyq oıyn úlgisin kórsete aldyq. Kemshilik te joq emes, áli de shyńdala túsý qajet. Stadıonǵa kelip qoldaǵan jankúıerlerge erekshe alǵys aıtamyn, tek olardy jeńisimizben qýanta almadyq. Alda áli de mańyzdy oıyndar bar, eńsemizdi túsirmeımiz, – dedi bas bapker.
Oıynnyń nebári 4-mınýtynda «Pafostyń» qorǵaýshysy Joaý Korreıa erejeni óreskel buzyp, alańnan qýyldy. Qorǵaýshynyń kemdigine qaramastan qarsylas klýbtyń oıynshylary eńsesin túsirgen joq. Kerisinshe, 2-taım orta tusynan aýǵanda «Qaırattyń» qorǵanysyn buzyp-jaryp, dúrkin-dúrkin shabýyldady.
Almatylyq klýb endi Chempıondar lıgasynyń jalpy kezeńindegi tórtinshi týryn syrt alańda ótkizip, 6 qarashada Italııanyń «San Sıro» stadıonynda mılandyq «Interge» qarsy oınaıdy. Odan buryn da bir mańyzdy match bar. Bıylǵy el chempıonatynyń sońǵy týrynda, 26 qazan kúni elordalyq «Astana» klýbymen tartysqa túsedi. Taǵdyrsheshti matchta qaı jeńgeni el chempıony atanady.
