Foto: Ulttyq ulan
Petropavl qalasynda ótken konferensııaǵa otandyq jáne sheteldik joǵary oqý oryndarynyń professor-oqytýshylar quramy, kýrsanttar men stýdentter qatysty. Áskerı saladaǵy aqparattyq qaýipsizdik júıesin jetildirýdi kózdeıtin sharada áskerı bilim berý júıesine sıfrlyq tehnologııalardy tıimdi engizý, áleýmettik jelilerdegi manıpýlıasııa, feık kontenttiń taralýy sekildi taqyryptar talqylandy.
Shara barysynda akademııanyń áskerı pedagogıka jáne psıhologııa kafedrasynyń oqytýshylary polkovnık Bolat Smaǵulov, zapastaǵy polkovnık Aleksandr Mıtıaev jáne podpolkovnık Qazybek Murataevtyń elektrondy oqý quraly túrindegi ujymdyq eńbegi kópshilik nazaryna usynyldy.
Oqý quralynda Ulttyq ulannyń strategııalyq kommýnıkasııalaryn jetildirý jónindegi usynymdar kesheni, onyń ishinde ınstıtýsıonaldyq, tehnologııalyq jáne bilim berý sharalary qarastyrylǵan. Oqý quraly HTML baǵdarlamasy tilinde qurastyrylǵan jáne «Aqparattyq-psıhologııalyq qarama-qaıshylyq», «Jýrnalıstıka negizderi» pánderi boıynsha kýrsanttardy daıarlaýǵa, sondaı-aq jeke qurammen tárbıe jumysyn júrgizý baǵytyn da qamtyǵan.
Konferensııada Ulttyq ulan akademııasynyń ekinshi kýrs kýrsanty Islam Aýeshan jasandy ıntellekttiń medıa ortadaǵy adam sanasyna yqpaly týraly ózekti baıandama jasady.
Ol medıa platformalardaǵy algorıtmderdiń paıdalanýshylardyń minez-qulqyn boljaý múmkindigine toqtalyp, bul úrdistiń aqparattyq qaýipsizdik pen jeke keńistikke áserin saralady.
Ǵylymı jıynǵa Qazaqstan men shet elderden 65-ten astam ǵylymı eńbek kelip túsken.
Jıyn qorytyndysynda sarapshylar Ulttyq ulan akademııasy bastamasymen júzege asyrylyp jatqan sıfrlandyrý baǵytyndaǵy ǵylymı zertteýlerdiń jańa sapalyq deńgeıge kóterilgenin oń baǵalady.
