Sýretti túsirgen – Álı Ǵalym
Májilis Spıkeri Erlan Qoshanovtyń tóraǵalyǵymen ótken jıynda «Qaryzsyz qoǵam», «Ákimder mektebi» jáne «Aýyl amanaty» partııalyq jobalarynyń nátıjeleri men múmkindikteri talqylandy. Qazirgi tańda júzdegen myń adam partııanyń biregeı platformasy arqyly qoldaý alyp otyr.
Memleket basshysy Joldaýynda «Qaryzsyz qoǵam» jobasynyń basty maqsaty – tek qaryzdy azaıtý emes, azamattardyń turaqty tabysqa qol jetkizýin qamtamasyz etý ekenin aıtty. Osyǵan baılanysty partııa azamattarǵa qarjylyq qıyndyqtan shyǵýǵa kómektesip qana qoımaı, olardy jumyspen qamtyp, jeke isin bastaýyna jaǵdaı jasaıdy.
«Eń bastysy – adamdardyń tek qazirgi máselesin sheshý emes, árbir azamat naqty qoldaý kórip, aıaqqa tura alatyn júıe qalyptastyrý. «AMANAT» partııasynyń servıstik modeli óz tıimdiligin dáleldep, Prezıdenttiń Ádiletti Qazaqstandy qurý baǵytyn júzege asyrýda naqty quralǵa aınaldy. Memleket basshysynyń barlyq reformasy halyqtyń ál-aýqatyn arttyrýǵa jáne elimizdiń damýyna baǵyttalǵan. Osy turǵydan alǵanda, partııalyq jobalar ár azamattyń laıyqty tabys taýyp, sapaly áleýmettik qyzmet alyp, erteńgi kúnge senimmen qaraı alýyna jaǵdaı jasaý úshin jumys isteıdi», dedi partııa Tóraǵasy.
Erlan Qoshanov partııalyq jobalar birtutas júıe retinde jumys isteýge tıis ekenin atap ótti. Iаǵnı zańgerlik kómek, oqytý kýrsy men jumys oryndaryn qurý qadamdary ózara baılanysyp, bir-birin tolyqtyryp turýy qajet. Onyń aıtýynsha, dál osyndaı keshendi tásil qarjylyq qıyndyqtardyń saldaryn joıýǵa ǵana emes, sonymen birge azamattardyń aıaqqa turyp, óz betinshe laıyqty ómir súre alatyn ýaqytqa deıin adamdarǵa súıenish bolýǵa múmkindik beredi.
Jobalyq keńseniń basshylary jumys nátıjesin usynyp, partııanyń servıstik modeliniń aıasyn keńeıtý boıynsha aldaǵy jospardy aıqyndady.
«Qaryzsyz qoǵam» jobasynyń atqarýshy dırektory Oljas Ordabaevtyń deregi boıynsha, bıyldan bastap 770 myńnan astam adamǵa qaryzdaryn qaıta qurylymdaý, shekteýlerdi alyp tastaý nemese bankrottyq máselelerinde naqty kómek kórsetildi. Sondaı-aq, azamattar qarjylyq saýattylyq kýrstaryna qatysa alady. Júıeniń maqsaty – tek bir rettik kómek emes, tólem qabileti qalpyna kelgenshe azamattardy súıemeldeý.
Búginde jalpy quny 600 mlrd teńgeni quraıtyn 12,7 myń ınvestısııalyq joba irikteldi. Osy qadam 490 myń jeke qosalqy sharýashylyqty qamtýǵa jáne 111 myń jumys ornyn qurýǵa múmkindik beredi. Bul – aldaǵy úsh jylǵa arnalǵan naqty jospar. Sarapshylardyń esebine sáıkes, «Aýyl amanaty» jobasy arqyly bólingen bıýdjet qarjysynyń ár teńgesi 1,24 teńge jıyntyq ekonomıkalyq tabys ákelýi múmkin. Bul qarajat óndiristiń, salyqtyń jáne aýyl turǵyndary tabysynyń ósimi túrinde qaıtady.
О́z kezeginde, Kásipkerlik máseleleri jónindegi jobalyq keńse jetekshisi Nurlan Saqýov partııanyń úılestirý keńesiniń jumysyna toqtaldy. Búginde atalǵan keńes mıkro jáne shaǵyn bıznespen ózara baılanystyń jańa arnasyna aınaldy. Keńes kásipkerlerdiń ózekti máselelerin jınaýǵa, júıeleýge jáne ony sheshý joldaryn tabýǵa múmkindik beredi. Sondaı-aq jasandy ıntellekt elementteri bar sıfrlyq platforma qurý josparlanýda. Sol arqyly kásipkerler óz ótinishin joldap, tıisti keńes alyp, olardyń sheshimin qadaǵalaı alady. Osy derekter negizinde iskerlik ahýal ındeksi qalyptastyrylady. Bul qadam problemalardy jedel anyqtaýǵa jáne ony sheshý boıynsha tıisti usynystar engizýge múmkindik beredi.
Sondaı-aq partııa Tóraǵasy «Qaryzsyz qoǵam» jobasynyń call-ortalyǵynyń jumysymen tanysty. Munda kún saıyn elimizdiń túkpir-túkpirinde nesıe máselesine, sot daýyna nemese qarjylyq qıyndyqtarǵa tap bolǵan azamattar 4 myńǵa jýyq qońyraý shalady. Call-ortalyqta 50-ge jýyq maman jumys isteıdi. Olardyń qatarynda zańgerler, medıatorlar jáne qarjy keńesshileri bar. Olar adamdarǵa qaryzdan qutylýǵa, qujattardy daıyndaýǵa jáne máseleniń zańdy sheshimin tabýǵa kómektesedi. О́ńirlerde 180 úılestirýshiden turatyn jeli azamattarǵa jergilikti deńgeıde quqyqtyq kómek kórsetedi.
«Qaryzsyz qoǵam» jobasyna «AMANAT» partııasynyń úılestirýimen 11 memlekettik organ men 12 kommersııalyq bank qatysady. Azamattar qogamfin.kz platformasy arqyly zańger keńesine jazylyp, paıdaly materıaldar men beıne sabaqtardy ala alady.
