Sýretterdi túsirgen – Jumabaı MUSABEKOV
Jańa úı Balpyq bı aýylynda boı kóterdi. 20 páterli jaldamaly turǵyn úıdiń kilti ortalyqtan qatynap jumys isteıtin, jaldamaly páterde turatyn jas mamandarǵa tabystaldy. Olardyń qatarynda 15 dáriger, 4 muǵalim, 1 polısııa qyzmetkeri bar. Keıingi úsh jylda aýdanǵa 55 dáriger kelip, eńbek etýde. Memleket tarapynan olarǵa barynsha jaǵdaı jasalǵan. 10 mln teńgege deıin kóterme járdemaqy berilip, «Dıplommen – aýylǵa!» baǵdarlamasy aıasynda qarjylaı kómek kórsetilgen. Páterlerdiń deni otbasy quramyna qaraı úlestirildi. Qonystoı ıeleriniń qýanyshy erekshe, endi olar turaqty baspanamen qamtylyp, óz qyzmetin alańsyz atqara alady.
О́ńir basshysy Beıbit Isabaev jumys sapary kezinde jańa turǵyn úıdiń sapasymen, aýmaǵynyń abattandyrylýymen tanysyp, turǵyndarmen kezdesti. Ákimniń aıtýynsha, bul joba aýdandaǵy maman tapshylyǵyn sheshýde mańyzdy ról atqarady.
– Keıingi bir jyldyń ishinde aýdanǵa 20-ǵa jýyq dáriger keldi. Sol oraıda olardyń turmys jaǵdaıyn jaqsartý kún tártibiniń aldyńǵy qataryna shyqty. Endi, mine, dárigerler men muǵalimder ózderiniń qyzmettik páterine ıe boldy. Bul – olardyń eńbegine kórsetilgen qurmet. Aldaǵy ýaqytta shaǵyn aýdannyń jan-jaqty damýyna basa kóńil bólinedi. Jasyl jelekterdi sýaratyn avtomatty júıe ornatý, ınfraqurylymdy jaqsartý josparda bar. Budan bólek, taǵy 7–8 kópqabatty turǵyn úı salýǵa múmkindik bar, – dedi oblys ákimi.
Jańa baspananyń ıgiligin kórip otyrǵan mamannyń biri – aýdandyq aýrýhananyń nevropatologi Nurgúl Buharova.
– Men osy aýdanda dúnıege keldim. Almatyda bilim alyp, biraz jyl sol qalada eńbek ettim. Keıin týǵan jerge oraldym, oǵan esh ókinbeımin. Endi, mine, turǵyn úı máselesi de sheshildi. Bul – aýylǵa kelgen dárigerlerge jasalǵan úlken qoldaý, – deıdi ol.
Jańa úıdiń taǵy bir turǵyny – aýdandyq polısııa bólimi tabıǵatty qorǵaý tobynyń ınspektory Elaman Dáýletov. Ol 2018 jyldan beri quqyq qorǵaý salasynda qyzmet etip keledi. Buǵan deıin óz qarajatyna páter jaldap kelgen.
– Meniń qyzmetim turǵyn úı jaldaý aqysyna ótemaqy tólenetin tizimge kirmeıdi. Sol sebepti páterdi ózim jaldap keldim. Jubaıym mektep-gımnazııada muǵalim. Úsh balamyz bar. Jańa páterge ıe bolý – zor mártebe. Memlekettiń osyndaı qamqorlyǵyn seziný bizdi alǵa yntalandyrady, – deıdi polısııa qyzmetkeri.
Aǵylshyn tili pániniń muǵalimi Móldir Jeńis te qýanyshyn jasyra almady.
– «B.Qundaqbaeva atyndaǵy №1 orta mektepte 2018 jyldan beri jumys isteımin. Buryn Taldyqorǵanda qyzmet ettim, keıin aýyl mektebine kelýdi jón kórdim. Eńbek ótilim – 12 jyl. Kópbalaly anamyn. Otbasymyzben óz baspanamyzǵa ıe bolyp, qýanyshqa kenelip jatyrmyz, – dedi pedagog.
Jańa úıdiń qurylysy bıylǵy sáýir aıynda bastalyp, josparly merzimde tolyq aıaqtalǵan. Jobany «Jarkent Alǵyr» qurylys kompanııasy júzege asyrǵan.
– Turǵyn úıde 10 úsh bólmeli, 5 eki bólmeli, 5 bir bólmeli páter bar. Úımen qatar ınjenerlik jelilerdi tartyp, aınalasyn abattandyrdyq. Turmys-tirshilikke qajet barlyq júıe tolyq iske qosyldy, – deıdi kompanııa dırektory Jalǵas Altynbekov.
Kóksý aýdanynda keıingi jyldary turǵyn úı qurylysy aıtarlyqtaı qarqyn alǵan. 2022–2024 jyldary aýdan kóleminde 175 úı paıdalanýǵa berilgen. Bıyl 110 otbasy baspanaly boldy. Nátıjesinde, turǵyn úı kezegi 5,8%-ǵa qysqardy.
Aıta ketý kerek, bıylǵy24 mamyrdan bastap turǵyn úıge kezekke qoıý, baspana berý fýnksııalary jergilikti atqarýshy organdardan «Otbasybank»-ke berilgen. Bul shara baspana máselesin sheshý isin ashyq ári tıimdi etýge baǵyttalǵan. Kóksý aýdanyndaǵy jańa 20 páterli turǵyn úı – aýylǵa kelgen bilikti kadrlardy qoldaýdyń aıqyn kórinisi. Bul bastama tek áleýmettik máseleni sheshý emes, sonymen birge aýyldyń damýyna serpin beretin mańyzdy qadam. Dáriger men muǵalimge jaǵdaı jasalsa, aýyldyń eńsesi kóteriledi. Aýyl eńsesin tiktese, el irgesi bekı túsedi.
