Onyń aıtýynsha, bank sektory búginde ekonomıkanyń qozǵaýshy kúshi bolýdyń ornyna keı jaǵdaıda qoǵam senimine selkeý túsirip otyr.
«Azamattardyń kelisiminsiz nesıe rásimdeýge baılanysty onlaın-alaıaqtyq búginde kúrdeli máselege aınaldy. Keıbir jaǵdaılarda bankter óz klıentteriniń jeke derekteriniń satylýy men taralýyna janama túrde sebepker bolyp otyr», dedi ol.
Elnur Beısembaev Memleket basshysynyń bastamasymen qolǵa alynǵan bank zańnamasyn reformalaý eski normalardy jańartýmen shektelmeı, salanyń damý fılosofııasyn túbegeıli ózgertýge baǵyttalýy tıis ekenin aıtty. Onyń aıtýynsha, sońǵy jyldary bankterdiń paıdasy eselep artqanymen, bul kórsetkish naqty sektordy qarjylandyrýǵa áser etpeı otyr.
«Ekonomıkanyń naqty sektoryna salynǵan jalpy ınvestısııadaǵy bank nesıeleriniń úlesi sońǵy on jylda 9 paıyzdan 3,5 paıyzǵa deıin tómendegen. Bıznesti damytýǵa baǵyttalǵan ınvestısııalar kóbine memlekettik baǵdarlamalar men kompanııalardyń menshikti qarajaty esebinen júzege asyp jatyr», dedi depýtat.
Sondaı-aq ol bankterdiń áleýmettik jaýapkershiligi men ashyqtyǵyn arttyrý qajettigin atap ótti.
«Biz bıýdjet qarajatynyń tolyq qaıtarylýyn, bank operasııalarynyń ashyqtyǵyn, básekelestik ortany damytýdy jáne ruqsatsyz jasalǵan tranzaksııalar úshin jaýapkershilikti kúsheıtýdi qamtamasyz etýimiz kerek», dedi Elnur Beısembaev.
Depýtat zań jobasynda bankterdi bıýdjet esebinen qutqarý tájirıbesiniń ornyna aldyn ala saýyqtyrý tetigi engizilip otyrǵanyna nazar aýdardy. Bul tásilde negizgi jaýapkershilik salyq tóleýshilerge emes, bankterdiń aksıonerlerine júktelmek.
«Prınsıp aıqyn: aksıonerlerdiń jaýapkershiligi men qarajatty bıýdjetke qaıtarý qamtamasyz etilmeıinshe, qoldaý kórsetilmeıdi», dep túıindedi ol.
