Bul aımaqtyq reıtıng Shyǵys, Ońtústik-Shyǵys, Ońtústik jáne Ortalyq Azııa óńirlerindegi ýnıversıtetterdiń jetistikterin saraptaıdy. Bıylǵy reıtıng – óziniń tarıhyndaǵy eń aýqymdy reıtıng bolyp otyr, oǵan 25 elden 1529 ýnıversıtet engen, onyń ishinde 554 joǵary oqý orny alǵash ret tizimge kirdi.
Ortalyq Azııa elderi arasynda Qazaqstan QS Asia University Rankings reıtınginde qatysý aıasyn aıtarlyqtaı keńeıtti – 112 ýnıversıtettiń ishinde 44 qazaqstandyq JOO endi. Salystyrý úshin: О́zbekstannan – 22 ýnıversıtet (204-ten), Qyrǵyzstannan – 6 ýnıversıtet (61-den), Tájikstannan 1 ýnıversıtet (27-den) engen.
Atap ótý kerek, bıyl reıtıngke 10 jańa qazaqstandyq ýnıversıtet endi:
- Nazarbaev ýnıversıteti – 201 oryn
- Almaty Menedjment ýnıversıteti – 741-750 oryndar
- Muhamedjan Tynyshbaev atyndaǵy ALT ýnıversıteti – 1001-1100 oryndar
- Abaı Myrzahmetov atyndaǵy Kókshetaý ýnıversıteti – 1101-1200 oryndar
- Alikhan Bokeikhan University – 1201-1300 oryndar
- Kaspıı ýnıversıteti – 1201-1300 oryndar
- Rýdnyı ındýstrııalyq ınstıtýty – 1301-1400 oryndar
- О́zbekáli Jánibekov atyndaǵy Ońtústik Qazaqstan pedagogıkalyq ýnıversıteti – 1301-1400 oryndar
- Astana International University – 1401-1500 oryndar
- Safı О́tebaev atyndaǵy Atyraý munaı jáne gaz ýnıversıteti – 1401-1500 oryndar.
Qazaqstandyq ýnıversıtetter akademııalyq bedel, oqytý sapasy, halyqaralyq yntymaqtastyq jáne túlekterdiń eńbek naryǵyndaǵy suranysy sııaqty reıtıngtiń negizgi kórsetkishteri boıynsha aımaqtaǵy úzdik nátıjelerdiń birin kórsetip jatyr.
«Sonymen qatar Qazaqstan – Ortalyq Azııa elderi ishinde Azııanyń eń úzdik top-100 ýnıversıtetine kirgen jalǵyz memleket: ál-Farabı atyndaǵy Qazaq ulttyq ýnıversıteti – 38-oryn, L.N. Gýmılev atyndaǵy Eýrazııa ulttyq ýnıversıteti – 61-oryn, Satbayev University – 79-oryn», - dep jazylǵan habarlamada.
Qazaqstannyń reıtıngtegi pozısııasynyń ósýi akademııalyq standarttardyń artýymen qatar halyqaralyq strategııalyq seriktestikterdi damytýda júıeli jumysynyń nátıjesin kórsetedi. Reıtıng derekteri boıynsha sheteldik jetekshi ýnıversıtetterdiń fılıaldaryn ashý jáne birlesken bilim berý men ǵylymı jobalarǵa qatysý eldiń joǵary bilim berý júıesiniń básekege qabilettiligin arttyrýǵa yqpal etedi.
Qazirgi tańda reıtıngke engen 29 qazaqstandyq JOO álemniń jetekshi ýnıversıtetterimen strategııalyq áriptestik ornatqan, al 15 joǵary oqý ornynda sheteldik ýnıversıtetterdiń fılıaldary jumys isteıdi.
Internasıonalızasııa kórsetkishteri de erekshe nazar aýdarady. QS agenttiginiń málimetinshe, Qazaqstan halyqaralyq stýdentter men zertteýshiler úshin aımaqtyq bilim ortalyǵyna aınalyp keledi. Bul el ýnıversıtetterinde sheteldik stýdentter men oqytýshylardyń úlesiniń joǵary bolýymen dáleldenedi.
Osylaısha, joǵary oqý oryndaryn strategııalyq seriktestikter qurý arqyly transformasııalaý Qazaqstannyń jahandyq bilim keńistigine kirigýiniń negizine aınalyp, joǵary bilim berý salasyndaǵy memlekettik saıasattyń tıimdiligin kórsetip otyr.
Aıta ketsek, QS agenttigi reıtıngti jyl saıyn kúzde jarııalaıdy. Akademııalyq kezeń kúzde bastalatyndyqtan ataýda kelesi jyl kórsetiledi jáne reıtıng kelesi kúntizbelik jyl boıy ózektiligin saqtaıdy.
