Ishki ister mınıstrliginiń habarlaýynshsha, oqıǵa bıyl tamyz aıynda bolǵan. Belgisiz adamdar messendjer arqyly zeınetkermen baılanysyp, ózderin polısııa men Ulttyq banktiń qyzmetkerleri retinde tanystyrǵan. Olar zeınetkerge «páterińizdi bóten adamdar óz atyna rásimdep, satýǵa shyǵardy» dep sendirip, múlkin saqtaý úshin páterin ózi satyp, qarajatty «qaýipsiz esepshotqa» aýdarýǵa shaqyrǵan.
Alaıaqtar zeınetkerdi Ishki ister mınıstrligi men Ulttyq bank «qylmyskerlerdi ustaýǵa baǵyttalǵan qupııa operasııa júrgizip jatyr» dep ılandyryp, bul týraly eshkimge aıtpaýyn qatań eskertken.
Olardyń aıtqanyn oryndaǵan er adam rıeltorlyq kompanııa arqyly páterin satyp, 39 mıllıon teńgeni kýrerge tapsyrǵan.
«Atalǵan derek boıynsha Qylmystyq kodekstiń 190-baby (Alaıaqtyq) boıynsha sotqa deıingi tergeý bastaldy. Jedel izdestirý is-sharalary barysynda polıseıler qylmysqa qatysy bar 23 jastaǵy er adamnyń jeke basyn anyqtap, ony ustady. Tekserý kezinde kúdiktiden 39 mıllıon teńge tabylyp, tárkilendi. Qazirgi ýaqytta ustalǵan azamat Astana qalasy polısııa departamentiniń ýaqytsha ustaý ızolıatoryna qamaldy. Tárkilengen qarajat ıesine qaıtaryldy», delingen IIM habarlamasynda.
Bıylǵy jyldyń basynan beri elorda aýmaǵynda úsh myńnan astam ınternet-alaıaqtyq deregi tirkelgen.
Polıseılerdiń aıtýynsha, mundaı qylmystardyń basty nysanasy — 50 jastan asqan azamattar. Sebebi olar kóbine qarjylyq saýattylyqtyń tómendiginen alaıaqtardyń qurbanyna aınalady. Quqyq qorǵaý organdary azamattardy saq bolýǵa jáne beıtanys adamdardyń qońyraýlaryna senbeýge shaqyrady.
Polısııa qyzmetkerleri eshqashan múlikti satýdy, nesıe rásimdeýdi nemese aqshany «qaýipsiz esepshotqa» aýdarýdy suramaıdy. Osyndaı mazmundaǵy qońyraý túsken jaǵdaıda áńgimeni dereý toqtatyp, jaqyn mańdaǵy polısııa bólimshesine habarlasý qajet.
