Qonys aýdarýshylardyń basym bóligi О́zbekstannan (143 otbasy) kelgen. Sondaı-aq Reseıden – 17, Túrikmenstannan – 3, Qytaıdan – 9, jáne Mońǵolııadan – 1 otbasy kelgen. Olardyń ishinde 158 otbasy Atyraý qalasynda, jeti otbasy Jylyoı aýdanynda, altaýy Qurmanǵazy aýdanynda, al bir-bir otbasynan Maqat jáne Isataı aýdandarynda qonystandy.
Atyraý oblysy jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Erkebulan Ábilqasymovtyń aıtýynsha, 2025 jylǵa arnalǵan óńirlik kvota boıynsha qandastardy qabyldaýǵa 103 oryn bólingen.
«Qarasha aıynda ótken komıssııa sheshimimen 64 otbasy, ıaǵnı 103 adam kvotaǵa engizildi jáne tıisti áleýmettik qoldaý sharalarymen qamtyldy. Bul kvota aıasynda 62 otbasy (100 adam) qonys aýdarýǵa arnalǵan 70 AEK kólemindegi áleýmettik tólem – 27,5 mln teńge aldy», dedi ol.
Sonymen qatar, 23 otbasyǵa turǵyn úıdi jalǵa alý jáne kommýnaldyq qyzmetterdi tóleý úshin 6,4 mln teńge kóleminde kómek kórsetildi. Bes otbasyǵa jalpy somasy 22,7 mln teńgege ekonomıkalyq mobıldik sertıfıkattar tabystaldy. Qosymsha 21 adamnyń «qandas» mártebesiniń merzimi alty aıǵa uzartyldy.
