Bıyl ulttyq báıgege jýrnalısterden 400-den astam ótinim kelip túsken. Salanyń saqa jýrnalısteri men medıa menedjerlerden jasaqtalǵan táýelsiz qazylar alqasynyń sheshimimen short-lıstke 44 nomınanttyń esimi endi.
Búgin júzden júırik shyqqan 11 BAQ ókili men ujymǵa «ÚRKER» estelik músinshesi jáne bir mıllıon teńge mólsherindegi aqshalaı syılyq tabystaldy.
Suraq-jaýap qana emes eldik máselelerdi kótere otyryp, suhbat berýshiniń bolmysyn ashýǵa umtylatyn suhbat janrynyń bıylǵy úzdikteri de anyqtaldy. Jyldyń úzdik suhbaty atalymynda ashylǵanyna 3 jyl bolǵan Qaz365.kz aqparat agenttiginiń qyzmetkeri Baýyrjan Karıpovtiń esemi erekshe elenip, jeńimpaz tanyldy.
Oqıǵanyń qalyń ortasynda júrip, shynaıy tirshilikti sheber jetkizetin reportaj janrynda Tengrinews.kz saıtynyń tilshisi Ivan Sýhorýkovtiń eńbegi baǵalanyp, Jyldyń úzdik reportajy atalymynda úzdik shyqty.
Qoǵamnyń túıitkildi taqyryptaryn kótergen qalam ustaǵan qaýym arasynan Áleýmettik taqyryptaǵy úzdik materıal atalymynda Vlast.kz saıtynyń tilshisi Tamara Vaaldyń baǵy jandy. Aıta keteıik, osy atalymda «Egemen Qazaqstan» gazetiniń tilshisi Murat Aıaǵanov esimi de úzdik tórttik tiziminen tabyldy.
«Úrker» baıqaýynyń táýelsiz qazylar alqasy Jyldyń úzdik jýrnalıstik zertteýi atalymynda «Atyraý» gazetiniń tilshisi Maıra Erǵalıdiń zertteýin bárinen joǵary baǵalady.
Aqparatty baıandap qana qoımaı, jiktep, saralaıtyn janrda Jyldyń úzdik analıtıkalyq materıaly atalymynda «Kazahstanskaıa pravda» gazetiniń tilshisi Ilıa Pashenko ulttyq júldeni qanjyǵalady.
Radıostansııadaǵy úzdik joba atalymynda 60 jylǵa jýyq ýaqyttan beri radıo tolqynda úni talmaǵan Shalqar radıosy jeńimpaz boldy.
San beıne ishinen sátti taspalanǵan «Kazahstanskaıa pravda» gazeti fototilshisiniń týyndysy Jyldyń úzdik fotosýreti boldy.
Jyldyń úzdik jańalyqtar portaly atalymynda Zakon.kz, Adyrna ulttyq portaly Newtimes.kz, Inbusiness.kz, arasynan Adyrna ulttyq portaly úzdik shyqty.
Úzdik óńirlik BAQ atalymynda Úrker ulttyq báıgesi «Astana aqshamy» gazetine buıyrdy. Bul nomınasııada Life09 aqparat agenttigi, «Jańaqorǵan tynysy» gazeti, Lada.kz agenttigi short-lıstten tabyldy.
Aıqap, Qstar Group, «Qazaqstan tarıhy», «Qalam» shyǵarmashylyq ujymdary Jyldyń úzdik podkasty nomınasııasynda talasqa túsip, Qstar Group-qa tıesili LS stories podkasty jeńimpaz atandy.
Medıa kókjıeginde jańa tynys bolyp ashylǵan ıýtýb-arnalar da nazardan tys qalmady. Jyldyń úzdik YouTube-arnasy nomınanty retinde Eksperty KZ jobasynyń baǵasy jandy.
Bıylǵy ulttyq báıge arnaıy 3 júlde taǵaıyndalýymen de aıryqshalandy. Jumysshy mamandyqtar jyly aıasynda eńbek adamdarynyń tókken terin eleýli deńgeıde nasıhattaǵan zakon.kz ujymy marapattaldy. Sondaı-aq «Kazahstanskaıa pravda» gazeti men Kazinform aqparattyq agenttigi de arnaıy júldemen oljaly boldy.
Talantty jýrnalıster men shyǵarmashylyq ujymdardy anyqtaýdy maqsat etken baıqaýdyń ótýine Mádenıet jáne aqparat mınıstrligi, «Medıa damytý qory» korporatıvtik qory muryndyq bolǵan. Al is-sharanyń demeýshileri – «Qazcontent» AQ, «Qazaq gazetteri» JShS jáne «Sport+» telearnasy.
