Qos júldeniń birinshisi «Grand challenge award» dep atalady. Bul – robottardyń biliktilik oıyndarynda rekord ornatqan absolıýtti chempıondarǵa beriletin týrnırdiń bas júldesi. Al «Albert einstein award» ataǵy úzdik ınjenerlik ázirlemesi bar, tehnıkalyq sheberligi joǵary komandalarǵa beriledi.
Buǵan deıin ulttyq qurama Jeneva-2022, Sıngapýr-2023, Grekııa-2024 jarystarynda da úzdik atanyp, halyqaralyq STEM baǵytynda álemdik kóshbasshy mártebesin ıelengen. Jasandy ıntellektiniń qarqyny kúsheıip, sıfrlyq tehnologııalar kúndelikti ómirimizge dendep enip jatqan ýaqytta robot qurastyryp, baǵdarlamalaý tilin erte jastan meńgerý zaman talabyna aınalǵany jasyryn emes.
«Dara daryndarymyz eki birdeı altyn marapatty qanjyǵasyna baılap, absolıýtti chempıon atandy. Tórt dúrkin jeńimpaz ataný úlken jetistik. Bul rette, komandanyń quramy birde-bir ret qaıtalanbaǵanyn atap ótken jón. Jyl saıyn el namysyn qorǵaýǵa jańa qatysýshylardy daıyndaımyz», dedi «USTEM Foundation» qoǵamdyq qorynyń jetekshisi Asylbek Myrzahmetov.
Elimizdiń quramasyn NIS Almaty-Medeý mektebiniń 9–10 synyp oqýshylary Rashat Dosymjan, Dáýlet Ilııas, Álıhan Orynbasarov, Madııar Ásetuly jáne Nurasyl Tursynbaev tanystyrdy. Olardyń jattyqtyrýshylary – Nurdáýlet Dosmaǵambet, Asylbek Myrzahmetov jáne Dýlat Baıtúlenov.
Bıylǵy jarystyń «Eco-Equilibrium» taqyryby jahandyq ekologııalyq problemalardy sheshýge jáne bıoártúrlilikti saqtaýǵa arnalǵan edi. Ulttyq qurama robotty ázirleý arqyly ekojúıelerdi qalpyna keltirýge basymdyq berip, erekshe kózge tústi. Olardyń roboty oıyn alańyndaǵy kedergilerdi alyp tastap, bıoártúrlilik birlikterin ekojúıelerge dál ornalastyratyn kúrdeli tapsyrmany sátti oryndap shyqty.
Aıta keteıik, Ulttyq quramany Oqý-aǵartý mınıstrliginiń «Daryn» respýblıkalyq ǵylymı-praktıkalyq ortalyǵy, «USTEM Foundation» qoǵamdyq qory, Alem.AI Halyqaralyq jasandy ıntellekt ortalyǵy, sondaı-aq otandyq «Cannect.AI» startaby qoldady.
