Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Polymbet Hasanovtyń málimetinshe, múmkindigi shekteýli jandarǵa túrli áleýmettik qyzmet kórsetetin tórt arnaıy áleýmettik saýyqtyrý ortalyǵy jumys isteıdi. Ortalyqtarda jyl basynan beri 1 456 adamǵa áleýmettik qyzmet kórsetildi. 17 myńnan astam múgedektigi bar adam arnaıy portal arqyly qajetti quraldar alyp, túrli áleýmettik qyzmetti paıdalandy.
«Onyń ishinde 6 797 adam mindetti gıgıenalyq quraldar, 5 019 adam sanatorıı-kýrorttyq em aldy. 2 115 adam protezdik-ortopedııalyq, 1 040 adam tıflotehnıkalyq, 1 001 adam jeke kómekshi qyzmetimen, 434 adam sýrdotehnıkalyq, 538 adam arnaýly júrip-turý quraldarymen, 205 adam ymdaý tili qyzmetimen qamtyldy», deıdi P.Hasanov.
Memlekettik áleýmettik tapsyrys aıasynda múgedekterdi tasymaldaıtyn 130 ınvataksı bar. Mundaı kólikter júrýi qıyn 3 346 adamdy 200 173 ret tasymaldady.
«Mundaı jumystar muqtaj jandarǵa qamqorlyq kórsetý, qolaıly orta qurý baǵytyndaǵy memlekettik saıasattyń nátıjesin kórsetedi. Bul is-sharalar erekshe qoldaýdy qajet etetin adamdardyń ómir súrý sapasyn arttyrýǵa, ortaǵa tolyq beıimdelýine múmkindik berip otyr», deıdi basqarma basshysy.
Múmkindigi shekteýli jandardyń arasynda qol qýsyryp qarap otyrmaıtyndar da bar. Sonyń biri – 53 jastaǵy Asylaı Aqbergenova.
«Jol apatynan keıin julynym zaqymdanyp, aýyr jaraqat aldym. Jaraqattyń saldarynan arbaǵa tańylsam da taǵdyrdyń aýyr synaǵyna moıymadym. Sol kezde 16 jasta edim. Biraq ómirge qulshynysymdy joǵaltpaı, 2009 jyly «Múgedek álemi» qoǵamynda eńbek jolymdy bastadym. Invataksı qyzmetinde úsh jyl dıspetcher bolyp jumys istedim», deıdi ol.
Budan soń Asylaı jumysyn Atyraý qalasyndaǵy №7 emhananyń tirkeý bóliminde jalǵastyrdy. Munda psıholog-reabılıtolog retinde qınalǵan jandardyń qalypty ómirge beıimdelýine kómegin kórsetedi. 2021 jyldan beri «Biz de adambyz» qoǵamdyq qoryna júgingen múmkindigi shekteýli jandarǵa úmit sáýlesin jaǵyp keledi.
«Túrli adammen jumys isteımin. Kóbinese ZPR, ZRR, RAS dıagnozy qoıylǵan balalar, túrli jaraqat alǵan eresekter keledi. Olardyń jan azabyn jaqsy bilemin. О́ıtkeni ózim de arbaǵa tańylǵannan keıin kúızeliste bolǵanmyn. Biraq ómirimdi ózim ǵana ózgerte alatynymdy túsindim. Sol sátten ómir súrýge qulshynysym artty, qyzyǵýshylyǵym oıandy», deıdi ol.
A.Aqbergenova bı ónerine de bet burdy. On jyl arbada otyryp, bı bıledi. Bul óneri jemisin berip, elimizdiń úsh dúrkin chempıony atandy. Halyqaralyq saıystarǵa qatysyp, júldeli oryndardy ıelendi. Sondaı-aq para oq atýdan jeńimpaz boldy. Qıyndyqqa qarsy turǵan qaısar jan jetistikteri úshin «Janshýaq» syılyǵymen marapattaldy.
Atyraý oblysy
