Foto: police_astana, ınstagram
Er adam jumysynan ýaqytsha ketý úshin ákesiniń qaıtys bolǵanyn aıtyp ótinish jasaǵan. Basshylyq oǵan demalys berip qana qoımaı, aqsha jınaýǵa da bastamashylyq jasaǵan. Bir aptadan keıin ol anasynyń da qaıtys bolǵanyn habarlap, qosymsha materıaldyq kómek alýdy kózdegen, biraq ony jeke qajettilikterine jumsaýdy josparlaǵan.
Alaıda áriptesteri teksermek bolyp, onyń anasymen baılanysqan. Anyqtalǵandaı, anasy tiri jáne densaýlyǵy jaqsy bolyp shyqqan. Sóıtip, aldaý faktisi áshkerelenip, qyzmetkerler polısııaǵa júgingen.
«20-dan astam áriptesi kúdiktiniń esep-shotyna ártúrli somalarda aqsha aýdaryp, janashyrlyq tanytyp, kómek kórsetýdi qalaǵan. «Alaıaqtyq» babymen qylmystyq is qozǵaldy. Qazirgi ýaqytta tergeý amaldary júrgizilip jatyr», dep habarlady Astana qalasynyń polısııa departamenti.
