Basqarý salasyndaǵy yntymaqtastyq

Júzdesýde elimizde memlekettik basqarýdyń tıimdiligi men eseptiligin nyǵaıtý, parasat mádenıetin damytý jáne memlekettik qyzmettiń kásibı­ligin arttyrý baǵytynda keshen­di sharalar júzege asyrylyp jat­qany aı­tyldy. Agenttik tóraǵasy mem­le­kettik basqarý reformalary Pre­zı­dent Qasym-Jomart Toqaev aıqyn­da­ǵan «Zań men tártip» jáne «Adal aza­mat» qaǵıdattaryna súıenetinin atap ótti.

Taraptar seriktestiktiń aldaǵy jos­par­laryn, atap aıtqanda, elimizdiń EYDU Keńesiniń Qoǵam­dyq para­sattylyq jáne tájirıbe alma­sýdy keńeıtý jónindegi usynymy aına­lasynda birqatar másele talqylady.

Sonymen qatar Darhan Jazyqbaı men Fransýz Ulttyq memlekettik qyzmet ınstıtýty (INSP) dırektory Marıvon Le Brınonen memlekettik qyzmet, basqarýshylyq kadrlardy daıarlaý jáne ǵylymı zertteý qyzmeti salasyndaǵy yntymaqtastyqty damytýǵa baǵyttalǵan nıet deklarasııasyna qol qoıdy.

Deklarasııa Memlekettik qyzmet isteri agenttigi men Fransýz Ulttyq memlekettik qyzmet ınstıtýtynyń memlekettik qyzmet júıesin jetildirý, memlekettik qyzmetshilerdiń quzyretin arttyrý jáne memlekettik saıasat salasynda zamanaýı tásilderdi engizýdi, áriptestik pen tájirıbe almasýdy kózdeıdi.

Yntymaqtastyqtyń negizgi baǵyt­tarynda memlekettik qyzmetshi­ler men mamandardyń oqý baǵdarlamalary jáne quzyretterin damytý, birlesken zertteý jobalary, sondaı-aq forýmdar, sımpozıýmdar, konferensııa­lar, saraptamalyq kezdesý­ler sııaqty ǵylymı jáne saraptama­lyq is-sharalardy ótkizý qarastyryl­ǵan. Oǵan qosa ozyq tájirıbe men biliktilikti arttyrý baǵdarlamalarymen almasý, onyń ishinde memlekettik qyzmetshilerge arnalǵan taǵylymdamalar kiredi.

– Qazaqstan Prezıdentiniń ustany­my – adamǵa baǵdarlanǵan jáne ser­vıstik memlekettik qyzmetti qalyptas­tyrý. Osy baǵytta biz halyqaralyq yntymaq­tastyqty, onyń ishinde fransýz árip­tes­terimizben de dıalogti keńeıtip kelemiz. Bizdiń maqsa­tymyz – naqty nátıjesin beretin ári mem­leket­tik apparattyń tıimdiligin arttyrýǵa kómektesetin sheshimder engizý, – dedi Mem­lekettik qyzmet isteri agenttiginiń tóraǵasy.

Qol qoıylǵan qujat memlekettik qyzmet salasyndaǵy kásibı yntymaq­tas­tyqty nyǵaıta otyryp, bilim, ádis­nama jáne úzdik tájirıbe almasýdyń jańa múmkindikterin ashady dep kútiledi.