Minez tanytqan match

Match aldynda ulttyq qurama­nyń bas bapkeri mindetin atqarýshy Talǵat Baısýfınov tas búrkenip qorǵanysta buǵyp almaı shabýylmen oınaýǵa basymdyq beriletinin aıtty. Ári solaı da boldy.

– Biz birer kún buryn syrt alańda Soltústik Makedonııa ulttyq quramasyna qarsy tar­tysqa túskende shabýylǵa kúsh salýdy maqsat tutty. Tipti birinshi taımnyń alǵashqy 15 mınýtynda dúrkin-dúrkin shabýyldap alań ıeleriniń «esin ekeý, túsin tórteý» etip tútip jiberdik. Jeńisti julyp alýǵa da bolatyn edi, ekinshi taım orta tusynan aýǵansha alda edik. Qorǵanysymyz qojyrap 74-mınýtta qarsylastar esepti teńestirdi. Belgııa ulttyq quramasyna «ne bel, ne belbeý keter» dep qaı­rap shyǵaramyz. Biz bul joly da álem chempıonatyna joldama ala al­maıtynymyz aıdan anyq. Dese de álemniń tańdaýly quramasyna qarsy qorǵanyp emes, shabýyldap oınaýdyń úlgisin kórsetemiz, – dedi.

Bilikti maman sózin jutqan joq. Oıynnyń 9-mınýtynda túbit murty tebindep kele jatqan 17 jastaǵy Dastan Sátbaev gol soǵyp, ulttyq qurama sapyndaǵy alǵashqy golyn enshisine jazdy. Dastan Sátbaev ulttyq quramada oınap, gol soqqan eń jas oıynshy atandy. 15 qarasha ol 17 jastan 3 aı, 3 kún asqan bolatyn. Buǵan deıin bul mártebe Erkebulan Seıdahmettiń enshisinde edi. Ol 2018 jyly 18 jastan 1 aı 19 kún asqanda Majarstan ulttyq quramasynyń qaqpasyna gol soqqan edi.

Buǵan deıin kóbine bes qorǵaýshy júıesimen oıyndy órbitýdi qup kórip kelgen bizdiń qurama bul joly qorǵanysty tórt oıynshyǵa tapsyrdy. Sóıtti de shabýylǵa úsh fýtbolshyny qatar salyp, taktıkalyq táýekelge bel býdy. Shabýyldy myǵym etýge Dastan Sátbaevtyń alǵashqy mınýttardan zor ekpin qosqany kóńil súısintti. 48-mınýtta Belgııa quramasynyń oıynshysy Vanakenniń esepti teńestirýi ýys­ta turǵan úsh upaı­dy sýsytyp jiberdi. Bul match jigit­terdiń «bolat qaınaýda shyny­ǵa­tynyn» kórsetti. 79-mınýtta sha­býylshy Islam Chesnokovtyń qyzyl qaǵaz alyp alańnan qýylýy da jigit­terdiń jigerin jasyta almady.

Ulttyq qurama álem chempıo­natyna irikteý aıasynda ótkizgen 8 match­tan 8 upaı jınady. Búgin bıylǵy jyljabar oıyndy Horva­tııanyń Pýla qalasynda túıindep, Farer araldary qura­masyna qarsy jol­dastyq match ótkizedi.