Sýretti túsirgen – Erlan OMAR, «EQ»
Invataksı qyzmetin birinshi toptaǵy múmkindigi shekteýli jandar, tirek-qozǵalysy qıyn naýqastar, jeke kómekshiniń súıeýimen júretin ne bolmasa múgedekter arbasyna tańylǵandar qoldana alady. Sonymen birge «aýtızm spektriniń buzylýy», «aqyl-oı kemistigi» dıagnozy tańylǵandar, psıhıkalyq minez-qulqynyń turaqtylyǵy buzylǵandar, Daýn sındromyna shaldyqqan syrqattar da ınvataksıdi tegin shaqyrta alady. Degenmen tapsyrys qabyldaýshylar kóbinese jumys istep júrgender men bilim alýshylarǵa kóbirek basymdyq beredi.
Eńbek jáne halyqty áleýmettik qorǵaý mınıstrligi bıyl erekshe qajettilikteri bar azamattarǵa ınvataksı qyzmetiniń agregatorlaryn paıdalanýdaǵy qanatqaqty jobany iske qosty. Igi bastamany júzege asyrý sheńberinde qańtar aıynan beri Astana, Almaty qalalarynda 401,9 myń tapsyrys qabyldanǵan. Byltyr múgedektigi bar adamdarǵa ınvataksı qyzmeti 207,2 myń ret kórsetilipti. Qyzmettiń jyldamdyǵy men sapasyn arttyrý maqsatynda mınıstrlik ákimdiktermen birlesip ózgeris engizdi. Aıtalyq, ınvataksı qyzmetine azamattar bir kún buryn telefon arqyly jazylýy qajet bolatyn. О́z saparlaryn aldyn ala josparlaýǵa, ınvataksıge bir kún buryn tapsyrys berip, kútýge týra keletin. Sondaı-aq qyzmetti usynýshy mekemelerde kólik quraldarynyń jetispeýshiligi de qolbaılaý edi. Osy jaǵdaılardy jeńildetý maqsatynda qyzmet kórsetýge taksı agregatorlaryn tartý baǵytynda qanatqaqty joba qolǵa alyndy.
Mundaǵy basty artyqshylyq – saparlardyń aqysynan paıyz eselenbeıdi. Buǵan deıin paıyzdyq ústeme agregator platformalarynyń paıdasyna aýdarylatyn. Iаndeks kompanııasy qanatqaqty jobaǵa óteýsiz negizde qatysýǵa nıet bildirdi. Osylaısha, ıgi is sheńberinde azamattar Iаndeks Go mobıldi qosymshasy arqyly ınvataksı qyzmetin qoldanýǵa múmkindik aldy. Invataksıge júgingen jandar kólikti qysqa ýaqytta tańdaıdy, onlaın rejimde tapsyrys mártebesin qadaǵalaıdy ári kólikpen qansha ret júrgenin saralap, monıtorıng jasaı alady. Qosymshada múgedektigi bar adamdardyń júrgizýshige sapardaǵy erekshe qajettilikteri týraly eskertýine arnalǵan ekran iske qosyldy. Júrgizýshiler adamdy kólikke otyrǵyzyp, dittegen jerge jetkizgen soń, túsirer kezde qalaı kómek kórsetý kerektigin arnaıy nusqaýlyq arqyly tanyp biledi.
Jaqynda Eńbek jáne halyqty áleýmettik qorǵaý mınıstrliginde ınvataksı qyzmetine qatysty keńes ótip, sol jobany áli de jandandyra túsý jaıy talqylandy. Múgedektigi bar adamdardy áleýmettik qorǵaý salasyndaǵy respýblıkalyq úılestirý keńesiniń «Qoljetimdi kólik» kishi tobynyń otyrysynda ınvataksı shaqyrtý Áleýmettik qyzmetter portaly arqyly júzege asyrylatyny aıtyldy. Eńbek jáne halyqty áleýmettik qorǵaý vıse-mınıstri Vıktorııa Shegaı ınvataksı qyzmetin jandandyryp, sapasyn jaqsartyp, ashyqtyǵyn arttyrý qanatqaqty jobanyń basty maqsaty ekenin atap ótti.
– Mınıstrlikte ótken keńeste ınvataksı qyzmetiniń jańa formaty egjeı-tegjeıli túsindirilip, qaǵıdalary qabyldandy. Invataksıge tapsyrys berýdi Áleýmettik qyzmetter portalyna kóshirýdiń tıimdiligi mol. Múgedektigi bar jandardyń óz betinshe tańdaý jasaýyna, qajettilikterin eskere otyryp kólik shaqyrtýǵa ári kútý ýaqytyn qysqartýǵa múmkindik beredi. Sondaı-aq úderisterdiń ashyqtyǵyn qamtamasyz etip, ınvataksı sanyn arttyryp, sapaǵa oń áser etedi, – dedi V.Shegaı.
Sonymen qatar ınvataksı qyzmetin usynýshylarǵa talap kúsheıetinin de eskertti. Jolaýshylardy mindetti saqtandyrý, arnaıy jabdyqtalǵan avtokólikterdiń sanyn arttyryp, olardy tizgindeýshi júrgizýshilerdiń tájirıbesine, biliktiligine basa nazar aýdarý júkteledi.
Astana qalasynyń jumyspen qamtý jáne áleýmettik qorǵaý basqarmasy áleýmettik jobalar men obektilerge qoljetimdilik bóliminiń basshysy Aınur Áýbákirova elordada qyzmet kórsetetin 134 ınvataksı kóligi bar ekenin, olardyń ishinde 26-sy arnaıy jabdyqtalǵanyn jetkizdi. Invataksı shaqyrýǵa ótinishterdi qabyldaý josparlanǵan is-sharaǵa deıin bir táýlik buryn dıspetcherlik qyzmetke telefonmen habarlasyp jazylatynyn eskertti.
– Invataksı qyzmetterin kórsetýdi jaqsartý, ótinim berý tetigin jetildirý maqsatynda 2023 jyldan bastap «Invataksı qyzmetterin Iаndeks taksı agregatory arqyly kórsetý» jobasy iske qosyldy. Jobaǵa bıyl 1129 múgedektigi bar adamdar men balalar qatysyp, 340 myńnan astam sapar júzege asyryldy. Jobany iske asyrý barysynda qyzmet alýshylar mobıldik qosymshany paıdalana alady. Onda táýlik boıy kez kelgen ýaqytta kólikke tapsyrys berip, onyń qozǵalysyn onlaın baqylaýǵa múmkindik bar. Sondaı-aq Iаndeks mobıldik qosymshasynda tehnıkalyq qoldaý júıesi qarastyrylǵan. Joba oń nátıje berip, qyzmet alýshylardyń kóńilinen shyqty. Sebebi búginde ınvataksı qyzmetine birden tapsyrys berý múmkindigi joǵary. Yńǵaıly mobıldik qosymsha kidirissiz isteıdi, táýlik boıy dıspetcherdiń jaýabyn kútpeı-aq kólik shaqyrtyp, júrý baǵytyn da qadaǵalaı alady, – deıdi maman.
Elordada ınvataksı qyzmetin usynýshy uıymnyń biri – «Qazaq zaǵıptar qoǵamy» qoǵamdyq birlestiginiń «Astana» korporatıvtik qory.
– Bizdiń ujym ınvataksı tasymalymen qatar jeke kómekshi qyzmetin de kórsetedi. Buryn bul qyzmetke júginýshi azamattar kúnine eki márte ǵana tapsyrys bere alsa, búginde birneshe ret saparlaýyna múmkindigi bar. Qyzmetti paıdalanýshylardyń qasynda jeke kómekshisi júredi. Ol óziniń týysy, aǵaıyny, tipti balasy da bolýy múmkin. Jeke kómekshisi bolmaǵan jaǵdaıda bizdiń kólik júrgizýshiler ınvataksı shaqyrǵan adamdy ózi kóligine otyrǵyzyp, dittegen jerine barǵan soń jaýapty adamdarǵa tabystaıdy. Astana qalasynda qyzmet kórsetetin 25 avtokóligimiz bar, – deıdi qordyń jetekshisi Omar Baımaqashev.
Invataksı qyzmetin kórsetýdiń jańa tetiginiń iske qosylýyn qamtamasyz etý maqsatynda Eńbek jáne halyqty áleýmettik qorǵaý mınıstrligi de tıisti daıyndyq jumystaryn júıeli júrgizip keledi. Áleýmettik qyzmetter portalynyń jumysyn retteıtin qoldanystaǵy normatıvtik quqyqtyq aktilerge, sonyń ishinde kepildendirilgen somany aıqyndaý, qyzmet kórsetýshilerdi tirkeý qaǵıdalaryna birqatar ózgeris engizildi. Invataksı tutynýshylardyń ıgiligine aınalýǵa tıis.
