Osydan eki jyl buryn Ahmet Baıtursynuly atyndaǵy QО́Ý janynan ashylǵan ınstıtýt jergilikti turǵyndarǵa tegin til úıretedi. Sondaı-aq munda káris halqynyń salt-dástúri men mádenıeti jóninde keń maǵlumat alýǵa bolatyn tanymdyq is-sharalar ótip turady.
«Búgingi festıvaldy birinshi ret uıymdastyryp otyrmyz. Jastardy kóbirek shaqyrdyq. Merekelik is-shara aıasynda káris halqynyń ulttyq bıine áýestenip júrgen óner toptarynyń baıqaýy ótedi. Baıqaý jeńimpazdaryna baǵaly syılyqtar daıyndap qoıdyq. Sondaı-aq kópshilik ulttyq taǵam ramen jeýden jarysady. Biz Ońtústik Koreıadan hambok dep atalatyn ádemi ulttyq kıimder satyp alǵanbyz. Festıval qonaqtary sol kıimderdi kıip kórip, fotosýretke túse alady», deıdi Qostanaıdaǵy Korol Sedjon atyndaǵy ınstıtýttyń dırektory Naǵıma Manasbaeva.
Festıval barysynda káris etnomádenı birlestiginiń ókilderi kópshilikke chegıchhagı, penıchhıgı, pesokchhıgı, kongınorı, ttakchı dep atalatyn ulttyq oıyn túrlerin tanystyrdy. Mysaly, chegıchhagı oıyny bala kezimizde bárimiz jarysa oınaǵan kádimgijarmaqqa uqsaıdy. Al pesokchhıgıdiń erejesi asyq oıynyna keledi. Sodan ba, jastardyń kóbi bul oıyn túrlerin tez ilip áketip, jarysa oınap jatty.
Is-sharany uıymdastyrýshylardyń sózinshe, Korol Sedjon HV ǵasyrda káristiń álipbıin túzgen. Búginde álemniń 50 shaqty elinde tulǵanyń atynda ınstıtýt bar. Onyń ekeýi Qostanaı men Shymkentte jumys istep jatyr.
Qostanaı oblysy
