Foto: istockphoto.com
Aýrýshańdyq deńgeıi qandaı?
Mınıstrdiń aıtýynsha, Qazaqstanda jyl saıyn shamamen 3,5 mln JRVI jáne 2 myńǵa deıin tumaý jaǵdaıy anyqtalady. Bıyl epıdemıologııalyq maýsym 1 qyrkúıekten bastalǵannan beri respýblıkada 1 mln 461 myń JRVI faktisi tirkelgen. Bul kórsetkish ótken maýsymnyń sáıkes kezeńimen salystyrǵanda 20 paıyzǵa tómen. Naýqastardyń 66 paıyzy – 14 jasqa deıingi balalar.
Sońǵy aptada el boıynsha 183 myń jaǵdaı anyqtalǵan. Bul ótken epıdemııalyq maýsymnyń osyndaı aptasymen salystyrǵanda aýrý juqtyrǵandar 16%-ǵa artqan
Tumaýdyń qandaı túrleri taralǵan?
Epıdemıologııalyq maýsym bastalǵaly tumaýdyń 590 zerthanalyq rastalǵan jaǵdaıy tirkelgen. Onyń 587-si – A (H3N2) tıpi, Qazaqstanda 2001 jyldan beri kezdesetin «Gonkong tumaýy». Qalǵan úsh jaǵdaıda A (H1N1) vırýsy anyqtalǵan.
«Bıyl tumaýdyń aınalymy 41 aptada, ıaǵnı qazan aıynyń birinshi jartysynda, ótken epıdemıologııalyq maýsymnan sál erterek anyqtaldy. Buryn Qazaqstan aýmaǵynda aınalymda bolmaǵan tumaýdyń jańa túrleri anyqtalǵan joq. JRVI jáne tumaý belgileri bar pasıentter tumaýǵa qarsy emes vırýstarǵa da tekseriledi. Respýblıka boıynsha rınovırýs, paragrıpp, adenovırýs, bokavırýs, koronavırýs, RS vırýsy, metapnevmovırýsterdiń aınalymda júrgeni baıqalady. JRVI-diń 66%-y 14 jasqa deıingi balalar arasynda taralǵan», dedi Aqmaral Álnazarova.
Mektep oqýshylary arasynda jaǵdaı qalaı?
Densaýlyq saqtaý mınıstrligi sońǵy aptada oqýshylar arasynda 6 myńnan astam JRVI oqıǵasy tirkelgenin habarlady. Bul – eldegi barlyq naýqastardyń shamamen 4%-y.
Vaksınasııa jáne daıyndyq sharalary
El boıynsha búginde 2,1 mln adam tumaýǵa qarsy vaksına aldy. Qoldanystaǵy ekpeler bıyl ózekti sanalatyn shtammdarǵa, sonyń ishinde A (H3N2) vırýsyna qarsy qorǵanys beredi.
Maýsymdyq ósimge baılanysty alǵashqy medısınalyq-sanıtarııalyq kómek uıymdarynyń jumysy kúsheıtilip, fıltr-kabınetter men epıdemııaǵa qarsy rejımniń saqtalýy qamtamasyz etildi. Vırýsqa qarsy jáne dene qyzýyn túsiretin preparattar, jeke qorǵanysh quraldary men dezınfeksııalyq zattar el boıynsha jetkilikti.
