Japon jerinde sýrdo dzıýdoshylarymyz júldeden taý turǵyzyp, buryn-sońdy buıyrmaǵan jetistikke keneldi. Buǵan deıin osy sport túrinen Hamza Ǵulama (66 kg), Shadııar Qýandyq (-73 kg), Erkebulan Qanafınniń (81 kg) top jaryp, ánuranymyzdy shyrqatqanyn súıinshilegen edik. Áıelder arasyndaǵy tartysta Ámına Faızýlına (70 kg) Sýrdlımpıada chempıony atandy. Erler saıysynda Aıdarbek Toqtarbek (100 kg) kúmis júldeni mise tutty. Al Sabyrjan Hapızov (+100 kg), Altynbek Kákitaev (60 kg), Aıym Jetpisbaeva (48 kg) men Anna Karmorova (78 kg) qola medal ıelendi. Balýandarymyz komandalyq tartysta da tabandylyq tanytty. Elimizdiń erler komandasy dzıýdodan komandalyq jarysta jeńimpaz atansa, áıelder quramasyna kúmis júlde buıyrdy. Sýrdo jeńil atletıkadan da 1 altyn, 1 qola júldemiz bar. Jeńisti sapar áli de jalǵasary sózsiz. Sýrdlımpıada básekesi 26 qarashada máresine jetedi.
Estý qabiletine zaqym kelgen sportshylardyń eń bedeldi básekesi sanalatyn Sýrdlımpıada saıysyna 81 elden 3 myńǵa tarta sportshy qatysyp, 21 sport túrinen medaldar jıyntyǵy úshin baǵyn synap jatyr. Ulttyq Sýrdlımpıada komıtetiniń prezıdenti Serik Sápıev sportshylardyń orasan jetistigi tynymsyz jattyǵý men eren eńbektiń jeńisi ekenine toqtaldy.
– Sizder senimdi aqtap, jankúıerlerdi qýantyp, eren tabysqa jettińizder. Bul – ujymnyń ortaq jeńisi. Elimizde sýrdo sport túrlerimen shuǵyldanýshylar úshin ınfraqurylymdy jaqsartýǵa aıryqsha kóńil bólinip, keshender boı kóterdi. Áli de salynyp jatyr. Munyń barlyǵy da sportty damytýǵa tyń serpin beredi, – dedi S.Sápıev.
2022 jyly Brazılııada ótken XXIV jazǵy Sýrdlımpıada oıyndarynda sportshylarymyz 29 medal (onyń tórteýi altyn) enshilep, rekordtyq nátıjemen oralǵan edi. Al Tokıo tórin usynǵan tórtjyldyq alamanynyń alǵashqy kúnderinde-aq 13 medal (altaýy altyn) oljalaýy el sportyn órkendetýge aıryqsha kóńil bólingenin ańǵartsa kerek. Dodanyń kórigi endi qyzyp keledi, qanjyǵamyz áli de maılana túsetini anyq.
