- 29 qarasha Shvesııanyń Estersýnd qalasynda bıatlonnan álem kýboginiń kezeńi bastalady. Bıatlon quramasynyń bapkerleri keńese kele dúbirli dodaǵa myna shańǵyshylardy qosýdy jón sanap otyr. Vadım Kýrales, Olga Poltoranına, Aısha Raqysheva, Vladıslav Kıreev, Áset Dúısenov, Kırıll Baýer, Mılana Geneva, Polına Egorova jarys jolyna shyǵady.
- Fýtboldan elimizdiń ulttyq quramasy Farer araldary ulttyq quramasyna qarsy joldastyq match ótkizip 1:0 esebimen jeńildi. Horvatııanyń Pýla qalasyndaǵy «Aldo Drosına» stadıonynda ótken tartysta jeńis golyn 26-mınýtta Knýdsen soqty. Ulttyq quramanyń bas bapkeri mindetin atqarýshy Talǵat Baısýfınov jyljabar tartysta ulttyq qurama sapyna jańa qosylǵan oıynshylardy salyp, shyńdaýdan ótkizdi.
- Qatardyń Doha qalasynda taekvondodan ótip jatqan halyqaralyq týrnırde Nodıra Ahmedova chempıon atandy. 53 kg salmaqta synǵa túsken jerlesimiz fınaldyq synda basty qarsylasy Kamkasýmfony jeńdi. Nodıra qazan aıynda Qytaıda ótken álem chempıonatynda qola medal enshiledi.
- Úndistannyń Nıý-Delı qalasynda bokstan álem kýboginiń qorytyndy kezeńi máresine jaqyndap keledi. Boksshylarymyzǵa ázirge altyn medal buıyrmaı tur. Áıelder synynda Dıana Maǵaýııaeva 80 kg salmaq dárejesinde dodaǵa qosylyp, qola medal buıyrdy. Jartylaı fınaldyq tartysta polıak Agata Kasmarskadan asa almady. Ásel Toqtasyn (+ 80 kg) da qola medaldy qanaǵat tutty. Jartylaı fınalda jerlesimiz ózbekstandyq Oltynoı Sotımboevaǵa ese jiberdi. Azııa chempıonatynyń kúmis júldegeri, álem kýboginiń qola medal ıegeri ózbek qyzy ábjildik tanytty.
- Er-Rııadta (Saýd Arabııasy) ótip jatqan Islam yntymaqtastyǵy oıyndarynda semserlesý tartysy qyza tústi. Rapıramen semserlesýden Sofııa Aktaeva jartylaı fınalǵa shyqty. Shırek fınalda ol Bahreın eliniń sportshysy Sýmaııa Al-Býaınaınnan 15:4 esebimen basym tústi. S.Aktaeva endi týnıstik Iаsmın Sýssıdi jeńse, altyn medaldyń aýyly jaqyndaı túsedi.
- Islam yntymaqtastyǵy oıyndarynda áıelder kúresinen synǵa túsken Zeınep Baıanova (53 kg) jartylaı fınalda jeńildi. Nıgerııalyq Krıstına Ogýnsanıamen beldesýge túsken otandasymyz baryn salǵanymen, tájirıbeli qarsylasy qarymdy boldy. Endi ol tájikstandyq Vatansýlton Shakarshoevamen kúresip, qola medal oljalaýǵa kúsh salady.
