Ábilahat Espaev – qazaq án ónerin jańa bıikke kótergen sanaýly kompozıtordyń biri. Ol 200-den astam mýzykanyń túrli janryna shyǵarma jazǵan. Aıtalyq, onyń «Marjan qyz», «Shofer keldi qyrmanǵa», «Ustazym meniń, ustazym», «Aq sáýle», «Saǵynysh eken bala kez», «Jaıyq qyzy», atty ánderin el áli kúnge deıin súıip tyńdaıdy.
Kesh barysynda biregeı ónerpazdyń ómiri men shyǵarmashylyǵy týraly jyly estelikter aıtyldy. Máselen, kompozıtor, Qazaqstannyń eńbek sińirgen qaıratkeri Jolaman Tursynbaev tulǵanyń ómirbaıanyndaǵy kópshilikke beımálim derekterdi áńgimeledi.
«Biz ol kisini «Ahat aǵa» deýshi edik. Birge qyzmet istedik. Týyndylary el arasyna keń taraǵan ondaı kompozıtor sırek. Biraq solaı bolsa da keńes ókimeti onyń ónerin moıyndady dep aıta almaımyn. Sebebi bar. Ábilahat aǵa – Qostanaı óńirinde týǵan. Uly aǵartýshy Y.Altynsarınniń atalas týysy. Ashtyq jyldary anasy tórt balasymen qaıtys bolady. Jalǵyz Ábilahat qana tiri qalǵan. Al ákesi Alash qaıratkerlerimen jaqyn aralasqandyqtan qýǵyndalyp, Jambyl oblysyna qonys aýdarǵan. Mine, osyndaı taǵdyrdyń taýqymetin tartsa da Ahat aǵa moıyǵan emes. Ol kisiniń barlyq áni elge birden tanyldy. Biz bala kúnimizde mahabbat qupııasyn «Áli esimde» atty áni arqyly bildik», dedi ol.
Al belgili kompozıtor, Qazaqstannyń eńbek sińirgen qaıratkeri Serik Erkimbekov maıdanger kompozıtor ásem áýezdi ánder ǵana emes, birqatar sahnalyq qoıylymdardyń mýzykasyn jazǵanyn jetkizdi.
«Anyǵynda, bul – kúrdeli jumys. Soǵan qaramastan Qazaq ult aspaptary orkestri men sımfonııalyq orkestrge arnap, tamasha týyndylar jazdy. Onyń názik sezimdi qozǵaıtyn romanstary da erekshe edi. Ol kisiniń óneri óz ýaqytynda baǵalanbady. Alaıda ýaqyt barlyǵyna tóreshi. Qazir Ábilahat aǵanyń ánderi eldiń aýzynan túspeıdi», dedi Serik Jeksembekuly.
Keshke kompozıtordyń qyzdary Gúlmıra men Gúlsim onlaın qatysyp, ákesi týraly estelikterimen bólisti. K.Baıseıitova atyndaǵy Qazaq Ulttyq óner ýnıversıtetiniń aǵa oqytýshysy, ónertaný ǵylymdarynyń magıstri Dılıa Dúıesinova óner ıesiniń shyǵarmashylyǵyna jan-jaqty taldaý jasady. Sazger Damý Oralǵazyuly men tanymal akter Syrym Qashqabaev talantty tulǵanyń júrekke jyly, syrly ánderin sóz etti. Is-shara sońynda qonaqtar Ulttyq akademııalyq kitaphana uıymdastyrǵan «Án áleminiń Ábilahaty» atty kórmeni tamashalady.
