Is-sharaǵa Shymkent qalasy ákiminiń orynbasary Arman Sábıtov, IIM kıberqylmysqa qarsy is-qımyl departamenti bastyǵynyń orynbasary Aslan Úskembaev, qala prokýrorynyń orynbasary Marat Erjan, ekonomıkalyq tergeý departamenti bastyǵynyń orynbasary Sanat Qulbaev, «Digital Road» IT-ındýstrııa qaýymdastyǵynyń ókili Seıdýlla Ismaılov jáne polısııa departamenti bastyǵynyń birinshi orynbasary Qurmanbek Sahov qatysty.
Forýmnyń negizgi maqsaty – qoǵamda «Zań men Tártip» ıdeologııasyn keńinen nasıhattaý, halyqtyń sıfrlyq saýattylyǵyn arttyrý, ınternettegi qaýipsizdik daǵdylaryn damytý, kıberqylmystar úshin jaýapkershilikti túsindirý jáne jeke derekterdi qorǵaýdyń mańyzdylyǵyna nazar aýdarý boldy.
Is-shara IT-jabdyqtar men robototehnıka kórmesimen bastalyp, keıin qatysýshylar nazaryna teatrlandyrylǵan kórinis usynyldy. Forýmdy Arman Sábıtov ashyp, ınternet-alaıaqtyqpen júıeli túrde kúresýdiń jáne memleket, kásibı orta men azamattar arasyndaǵy ózara yqpaldastyqty arttyrýdyń mańyzyn atap ótti.
Spıkerler forým barysynda ınternet-alaıaqtyq úshin qylmystyq jaýapkershilik týraly túsindirip, mundaı qylmystardyń kópshiligi azamattardyń sengishtiginen bolatynyn aıtty. Qurmanbek Sahov alaıaqtyqtyń keń taraǵan tásilderin, odan qorǵaný joldaryn jáne qoǵamda sıfrlyq qaýipsizdik mádenıetin qalyptastyrý qajettigin jan-jaqty baıandady.
Forýmnyń erekshe bóligi – «Moshennıkı» fılminde basty rólde oınaǵan qazaqstandyq aktıor Rústem Omarovtyń vıdeoúndeýi boldy. Ol turǵyndardy saq bolýǵa, kúmándi onlaın-habarlamalarǵa senbeýge jáne sıfrlyq saýatty únemi arttyrýǵa shaqyrdy.
Budan bólek, ınternet-alaıaqtyqtyń keń taralǵan túrleri men olardyń saldary týraly beınerolık kórsetildi. Spıkerler kıberqylmystardyń aldyn alý baǵytynda qabyldanyp jatqan sharalar jóninde aıtyp, alaıaqtar áleýmettik jelilerdi, messendjerlerdi jáne jalǵan onlaın-servısterdi jıi paıdalanatynyn atap ótti.
Forým azamattardy qabyldaýmen aıaqtaldy. Sala mamandary turǵyndardyń ınternet-alaıaqtyqqa qatysty saýaldaryn tyńdap, kıberqaýipterge tap bolǵan jaǵdaıda qandaı áreket jasaý kerektigi jóninde keńes berdi.
