Osy baǵyttaǵy júıeli jumysqa Qonaev qalasynda júzege asqan «Ákimder mektebi» jobasy eleýli úles qosty. Joba aýyl ákimderine zamanaýı basqarý quraldaryn meńgerýge múmkindik berip, pikir almasýdyń jáne tıimdi sheshimder izdeýdiń alańyna aınaldy. Sonyń nátıjesinde mundaı kezdesýlerdiń sapasy edáýir artty.
Oblystyq ákimdikte óńirdiń toǵyz aýdanynyń aýyldyq okrýg ákimderi bas qosty. Olar – okrýgterdiń damýyna jaýapty, tikeleı daýys berý arqyly saılanǵan basshylar.
Almaty oblysynyń ákimi Marat Sultanǵazıev: «Aýyl – óńir ekonomıkasynyń negizi. Máseleni oblysqa jetkizbeı, jergilikti jerde sheshý mańyzdy. Eger usynys aýyl turǵyndarynyń jaǵdaıyn jaqsartýǵa baǵyttalǵan bolsa, biz ony qoldaýǵa daıynbyz», – degendi atap ótti.
Kezdesýde jergilikti ózin-ózi basqarý tetikterin kúsheıtý qajettiligi aıtyldy. Onyń ishinde ákimderdiń saılaýaldy baǵdarlamalaryn oryndaý boıynsha halyq aldynda turaqty esep berý praktıkasyn zańmen bekitý usynyldy. Bıýdjet máseleleri de keńinen talqylandy. Aýyl ákimderine kólik ıeleri týraly aqparatqa qol jetkizý, jyljymaıtyn múlikti naryqtyq qun boıynsha baǵalaý jáne jeke tabys salyǵyn jumys orny boıynsha tóleý qaǵıdatyn engizý jóninde usynystar jasaldy. Bul aýyl bıýdjetteriniń kiris bóligin nyǵaıtýǵa múmkindik beredi.
Aýyl sharýashylyǵy ónimderin óńdeý ınfraqurylymynyń damýy — bıznes ósiminiń mańyzdy sharty. Ákimder shaǵyn sehtar, soıý pýnktteri men qoımalardy óńirlik standarttardyń mindetti elementi retinde engizýdi de qaperge aldy.
«Aýyl amanaty» jobasyn iske asyrý kezinde kepil máselesiniń ózekti bolyp otyrǵany aıtyldy. Qatysýshylar «Damý» qory arqyly kepildik berý jáne taýarlyq nesıe júıesin engizý bastamalaryn qoldady. Sondaı-aq aýyldar men kooperatıvterdiń mamandanýyn naqty esepke alý qajettiligi kóterildi.
Ákimdik apparattary qyzmetkerleriniń eńbekaqysyn arttyrý jáne jańa KPI ázirleý máseleleri talqylandy. Básekege qabiletti jalaqy men naqty kórsetkishterdiń bolmaýy kadrlardy tartýdy qıyndatatyny atap ótildi. Osyǵan baılanysty okrýgterdiń jeke damý baǵdarlamalaryn jasap, ákimdikterdiń naqty múmkindikterine saı KPI belgileý usynyldy.
Pikirtalas barysynda jaıylym tapshylyǵy, jer ýchaskelerine qatysty aqparattyń qoljetimsizdigi, aýyldyq apparattarda mamandardyń jetispeýshiligi sııaqty máseleler kóterildi. Jer jáne veterınarııa mamandarynyń shtattyq birlikterin engizý, sondaı-aq qatty turmystyq qaldyqtar polıgondaryna arnalǵan úlgilik jobalardy ázirleý usynyldy.
Sıfrlandyrý salasyndaǵy kedergiler de aıtyldy. Memlekettik derekter bazalaryna qol jetkizýdiń shekteýliligi áleýmettik-ekonomıkalyq monıtorıng júrgizýdi qıyndatady jáne shalǵaı aýyldarda jedel járdem shaqyrýy men kezbelik janýarlardy ustaý jumystarynyń úılesimdiligine áser etedi.
Barlyq usynystar júıelenip, tıisti memlekettik organdarǵa joldanatyn bolady. Aldaǵy ýaqytta aýyl ákimderi Memleket basshysynyń qatysýymen ótetin respýblıkalyq dıalog alańynda óz bastamalaryn tanystyrady.
«Búginde aýyl basshylary kezdesýlerge shaǵymmen emes, ıdeıamen keledi. Bul – olardyń kásibı ósýiniń jáne nátıjege baǵyttalǵan jumystyń kórsetkishi. Bizdiń mindet – osy qarqynǵa qoldaý kórsetip, tıimdi jumys isteýge qajetti quraldarmen qamtamasyz etý», – dedi Qazaqstan Respýblıkasy Prezıdenti janyndaǵy Memlekettik basqarý akademııasynyń Almaty oblysy boıynsha fılıalynyń dırektory Qazybek Daýtalıev.
Almaty oblysy.
