Aýdannyń týrıstik áleýeti jyl saıyn artyp keledi. Qazir munda 28 týrıstik nysan qyzmet kórsetedi, bıylǵy jarty jyldyqta 18 myń týrıst kelip, kórsetkish 4,7%-ǵa ósken. Aımaqta «Jarkent Meshiti», Áýlıeaǵash, Kerimaǵash, «Jarkent-Arasan» sııaqty tartymdy oryndardyń bolýy týrızmdi damytý múmkindigin keńeıtedi. Osy maqsatta oblysta Týrızm basqarmasy qurylyp, bes aýdanda, onyń ishinde Panfılovta týrızm bólimderi ashyldy.
Jańa «Balqash Tazalyq» jáne «Alakól Tazalyq» kásiporyndary jaǵalaýdy sanıtarlyq tazalaý, qoqys shyǵarý, qoǵamdyq ájethanalardy kútip ustaý, jaryqtandyrý júıesine qyzmet kórsetý, kógaldandyrý men jol bólikterin tazalaý sııaqty mindetterdi oryndaıdy. «Alakól Tazalyqqa» 40-tan astam, «Balqash Tazalyqqa» 20-dan astam qyzmetker qabyldanyp, maýsym kezinde qosymsha jumysshylar tartylady. Ár mekemege 20-dan asa arnaıy tehnıka (býldozer, ekskavator, qoqys tasyǵysh, trısıkl, qaıyq jáne t.b.) satyp alý josparlanǵan.
Kólder jaǵalaýynyń ınfraqurylymyn jaqsartý baǵytyndaǵy jumystar da jalǵasýda. Úsharal áýejaıynyń ushý-qoný jolaǵy jańartyldy, «Taldyqorǵan – Úsharal» jáne «Úsharal – Dostyq» joldary qaıta jasaldy. Aqshı aýylynda káriz júıesi salynyp, 56 shaqyrymnan asa elektr jelisi tartyldy.
Balqash jaǵalaýynda beı-bereket qurylysqa jol bermeý úshin jańa jospar bekitildi. Lepsige deıingi joldar jasalyp, bıyl «Almaty – О́skemen – Lepsi – Aqtoǵaı» trassasy ashyldy. Qazir jaǵalaýdy abattandyrý jáne ınjenerlik jelilerdi tartý jumystary júrip jatyr: 9,3 km jol, 32 km sý, 17 km káriz jáne 36 km elektr jelisi salynady.
Bul sharalar týrızmdi damytýǵa jáne óńirdiń tabıǵı aımaqtaryn tıimdi qorǵaýǵa baǵyttalǵan.
