Parlamentarızm ınstıtýty dırektorynyń orynbasary Lázzát Súleımenniń sózinshe, balalar densaýlyǵyna qaýip tóndiretin ónimder máselesi – ulttyq qaýipsizdikke tóngen qater.
«Búgin bizge keshendi júıe qurý qajet: baqylaý, aldyn alý, aǵartý jáne ekonomıkalyq sharalardy biriktirý – kezek kúttirmes másele», deıdi ol.
Senat depýtaty Bıbigúl Jeksenbaıdyń aıtýynsha, balalardyń qaýipsizdigi men sapaly ónimge qol jetkizýi zańnamalyq turǵydan qorǵalatyn másele. Qoǵam tarapynan da baqylaý kúsheıýi kerek.
Al Májilis depýtaty Nurgúl Taýqyzy energetıkalyq sýsyndar, fastfýd jáne quramynda qant, tuz, jasandy qospalary bar ónimderdiń zııanyn aıta kele, elimizde 6-9 jas aralyǵyndaǵy balalardyń 21%-da artyq salmaq nemese semizdik bar ekenin, jasóspirimderdiń 40%-dan astamy energetıkalyq sýsyndardy turaqty túrde tutynatynyn tilge tıek etti. Sondaı-aq durys tamaqtaný mádenıetin qalyptastyrý, ónimderdiń arnaıy tańbalanýy men otandyq paıdaly ónim óndirisin damytý qajettigin aıtty.
«Astana» medısına ýnıversıteti, nýtrısıologııa kafedrasynyń dosenti Saýle Tárjibaevanyń sózinshe, durys tamaqtaný salasynda alańdatarlyq úrdister kóp. Ol balalar men jasóspirimder arasynda tynys alý joldary, as qorytý júıesi, júıke júıesi, sondaı-aq ınfeksııalyq jáne parazıtarlyq aýrýlar kóbeıgenin jetkizdi. Sonymen qatar tátti sýsyndardy tutyný 10,9%-dan 16,7%-ǵa ósken, kúndelikti tutyný 11-15 jas aralyǵyndaǵy jasóspirimderde 67,8%-ǵa jetken, al qyzdar arasynda 65,5%-dy quraıdy.
«TechnoWomen» uıymynyń tóraıymy Ázıza Shójeeva óz sózinde dúkenderde ashyq ári baqylaýsyz satylatyn zııandy ónimderdiń balalar úshin ońaı qoljetimdi ekenin aıtty. Ol ótken jyly osyndaı ónimderdi qoldaný nátıjesinde 24 balanyń aýrýhanaǵa túskenin jetkizdi. Onyń aldyn alý úshin mundaı ónimderdi mindetti túrde markırovkalaý qajet ekenin atap ótti.
