Qazaqstandaǵy jeńil avtokólikter men jeńil kommersııalyq kólikterge arnalǵan lızıng qyzmetteriniń kólemi sońǵy jyldary aýytqyp otyr. Finprom.kz dereginshe 2018 jyly naryq kólemi 4,5 mlrd teńgeden assa, 2019 jyly ol 1,6 mlrd teńgege deıin azaıdy. 2020 jyly kerisinshe kúrt ósim baıqalyp, kórsetkish 11,2 mlrd teńgege jetti. Alaıda sharyqtaý kezeńinen keıin sektor qaıta quldyrap, 2024 jyly jyldyq kólem 1,1 mlrd teńgege deıin tómendedi.
Aýyldyq jerlerdiń úlesi de aıtarlyqtaı qubylyp otyrdy. 2018 jyly aýylǵa tıesili úles shamamen 13% nemese 592 mln teńgeni qurasa, 2020 jyly bul kórsetkish nebári 0,1%-ǵa deıin tómendedi. Keıin úrdis birtindep qalpyna kelip, 2023 jyly aýyldyq aýmaqtardyń úlesi 3,7%-ǵa, al 2024 jyly 15,5%-ǵa deıin ósti.
2024 jyldyń birinshi jartyjyldyǵynda jeńil avtokólikterdi lızıngke berý kólemi 846,1 mln teńgeni quraǵan, al 2025 jyldyń alǵashqy alty aıynda bul kórsetkish 11,6%-ǵaı ósip 944,4 mln teńgege jetti. Degenmen aýyldyq sektorda jaǵdaı kerisinshe: kórsetkish 153,3 mln teńgeden 46,7 mln teńgege deıin tómendep, 3,3 ese qysqardy, al aýyl úlesi 18,1%-dan 4,9%-ǵa deıin azaıdy.
Jeke tulǵalar esebinen kórsetiletin lızıng qyzmetteri jyldar boıy tómen deńgeıde qalyp, naryqty negizinen korporatıvtik segment qamtamasyz etti. 2018 jáne 2019 jyldary halyq qatysqan lızıng kólemi nebári 32 mln jáne 28,4 mln teńgeni qurady, aýyldyq aımaqtarda múlde qyzmet kórsetilmedi. 2020–2021 jyldary bul baǵytta kútpegen ósim tirkelip, halyq úlesi tıisinshe 23% jáne 27,7%-ǵa deıin jetti, al kólem 2,6 mlrd jáne 2,2 mlrd teńgeni qurady. Alaıda aýyldaǵy kórsetkish birneshe júz myń teńgeden aspady. 2022 jyly halyqtyń úlesi qaıta 12,3%-ǵa deıin tómendep, 2023–2024 jyldary 3%-ǵa de jetpedi. 2023 jyly halyq esebinen kórsetiletin barlyq lızıngtik qyzmet tek aýyldyq jerlerge tıesili boldy, dál osyndaı jaǵdaı 2024 jyly da qaıtalandy.
2025 jyldyń qańtar–maýsym aılarynda jeke tulǵalar esebinen lızıng kólemi 3,8 ese ósip, 84,9 mln teńgege jetti, al naryqtaǵy úlesi 2,1%-dan 9%-ǵa deıin artty. Degenmen bul kórsetkishter turaqty trendtiń qalyptasqanyn bildirmeıdi, sebebi aýyldyq aımaqtardyń úlesi qaıta nólge jaqyndady. Bul naryqtyń haotıkalyq sıpatyn kórsetedi: keı jyldary suranys tek qalada, kelesi jyldary tek aýylda qalyptasady.
Jalpy alǵanda, jeke tulǵalarǵa arnalǵan avtolızıng naryǵy áli de tar jáne turaqsyz. Naryq kólemi keı jyldary mıllıardtaǵan teńgege jetse, keıde ondaǵan mıllıonǵa deıin tómendeıdi. Sondyqtan jeltoqsanda iske qosylatyn jańa baǵdarlama der kezinde qabyldanǵan bastama bolyp otyr. Qoldanystaǵy derekter kórsetip otyrǵandaı, arnaıy qoljetimdi baǵdarlama bolmaǵan jaǵdaıda turmystyq avtolızıng qalada da, aýylda da turaqty damýǵa qabiletti emes.
Baǵdarlama aýyldyq jerler úshin de mańyzdy ról atqarýy múmkin. Eger lızıngtik kompanııalardyń óńirlik fılıaldary belsendi túrde qatyssa, tozyǵy jetken jeńil avtoparkini jańartý múmkindigi artady. Birqatar oblystarda 20 jyldan asqan kólikterdiń kóptigin eskersek, bul aýyldar úshin asa ózekti másele bolyp otyr.
