Ásel Shymkent qalasynda qarapaıym otbasynda dúnıege kelgen. Ákesi – kran júrgizýshisi, anasy – mektep muǵalimi. 8-synypta Nazarbaev Zııatkerlik mektebiniń grantyn jeńip alǵan ol bolashaq armanyna qol jetkizý úshin baryn saldy. Bul onyń úlken múmkindikter álemine alǵashqy qadamy edi.
9-synypty aıaqtaǵannan keıin AQSh-qa baryp, Boston qalasynda eki aptalyq oqý baǵdarlamasyna qatysady. Garvard sekildi áıgili ýnıversıtetterdiń atmosferasyn sezingen jas túlektiń júreginde úlken arman oıanady. Kúnderdiń birinde men de osynda oqımyn degen maqsat dál sol kezde qalyptasypty.
Alaıda ata-anasy 16 jastaǵy qyzdaryn jat elge jalǵyz jiberýge alańdap, oǵan ýaqytsha ruqsat bermeıdi. Biraq bul sheshim Áseldiń arman otyn óshirmeı, kerisinshe óz elinde bilimin tereńdetýge ıtermeledi. Keıin Ásel bilimin elordadaǵy Nazarbaev Ýnıversıtetinde jalǵastyrady. «Bıologııa ǵylymdary» boıynsha úzdik nátıjeler kórsetip, bakalavrdy qyzyl dıplommen támamdaıdy. Osylaısha, ol óziniń ǵylymı áleýetiniń joǵary ekenin aınalasyna dáleldeıdi.
Ýnıversıtetti bitirgen soń Áselge birden AQSh-tyń 6 ýnıversıteti magıstratýraǵa shaqyrtý jiberedi. Biraq ol álemge áıgili Stenford ýnıversıtetin tańdaıdy.
Stenford ýnıversıteti jas ǵalymnyń áleýetin baǵalap, onyń oqýyna jáne ǵylymı zertteýlerine 350 mıllıon teńgege jýyq grant bóledi. Bul – tek oqý aqysy emes, bolashaq zertteýshiniń múmkindikterine jasalǵan úlken senim.
Ásel Ibadýllanyń bul jetistigi – tabandylyq pen eńbek arqyly kez kelgen qıyndyqty múmkindikke aınaldyrýǵa bolatynyn kórsetetin anyq mysal. Qarapaıym otbasynan shyǵyp, álemdik deńgeıdegi ǵylym ordasyna jol alý – qazaq jastarynyń áleýetiniń qanshalyqty joǵary ekenin bildiredi.
Áseldiń jetistigi – qazaq qyzynyń qaısarlyǵy men bilimdiliginiń kórinisi. Tıisinshe, Áseldiń tabysy jas býynǵa shabyt syılaıdy.
