Qaralatyn máseleler naqtylandy

Bıýroda atap ótilgendeı, Senattyń is-sharalar josparyna sáıkes depýtattar osy aptada ındýstrııalyq aımaqtaǵy óńdeýshi ónerkásip kásiporyndarynyń qyzmeti, mashına jasaýdy damytý, aýyl sharýashylyǵy salasyn ártaraptandyrý jáne aýyl sharýashylyǵy ónimderin tereń óńdeý jónindegi iri jobalardy ulǵaıtý (Shardara aýdanyndaǵy krahmal melassasyn óndirý jónindegi jańa ınnovasııa­l­yq kásiporyn bazasynda) máseleleri bo­ıynsha múddeli taraptarmen birqatar kezdesý ótkizedi. Atalǵan is-sharalardyń qatarynda Qazaqstandaǵy sıfrlyq aktıvter ındýstrııasyna jáne sot-saraptama qyzmetine qatysty máseleler talqyla­natyn kezdesýler de bar.

Máýlen Áshimbaev Memleket bas­shysy­nyń ekonomıkany ártaraptan­dyrý jónindegi tapsyrmasyna nazar aýdaryp, ony iske asyrý úshin báseke­ge qabiletti, tereń óńdelgen ónim shyǵarý­ǵa basymdyq berý aıryqsha mánge ıe ekenin aıtty. Osyǵan baılanysty depýtattar Mashına jasaý máseleleri boıynsha arnaıy zań jobasyn ázirledi. Salany damytýǵa qajetti zańnamalyq túzetýler jáne basqa da bastamalar Senattyń turaqty komıtetteriniń aldaǵy otyrystarynda múddeli taraptarmen birge jan-jaqty talqylanady.

Sondaı-aq bıýro músheleri Senat otyrysynda qaralatyn máselelerdiń kún tártibin aıqyndady. Soǵan sáıkes aldaǵy beısenbide senatorlar «1992 jylǵy Shekaraaralyq sý arnalary men halyqaralyq kólderdi qorǵaý jáne paıdalaný jónindegi konvensııaǵa Sý jáne densaýlyq problemalary týraly hattamany ratıfıkasııalaý týraly» zańdy qaraıdy. Hattama sý resýrstaryn tu­raqty basqarý esebinen, sondaı-aq sý­men baılanysty aýrýlardyń tar­alý dárejesin boldyrmaý jáne shek­teý arqyly halyqtyń densaýlyǵy men ál-aýqatyn qorǵaýdy qamtamasyz etýge baǵyttalǵan. Atalǵan qujattyń negizgi maqsattary Ornyqty damý maqsattarymen strategııalyq turǵydan korrelıasııalanady.

Sonymen qatar «Qazaqstan Respýb­lıkasy Úkimeti men RF Úkimeti arasyn­daǵy «Chelıabi memlekettik ýnıversıteti» joǵary bilim berýdiń federaldyq memlekettik bıýdjettik bilim berý mekemesi Qostanaı fılıalynyń jumys isteýi týraly kelisimdi ratıfıkasııalaý týraly» zań palata otyrysynyń kún tártibine shyǵaryldy. Kelisimde jazylǵandaı, fılıalda oqý eki memlekettiń memlekettik jalpyǵa mindetti joǵary bilim berý standarttaryna sáıkes qazaq, orys jáne basqa tilderde júrgizilmek.

Is-sharada Senat depýtattary Májilis qabyldaǵan zańdardy jumys úshin turaqty komıtetterge bólip berdi.