Foto: shutterstock.com
KASE deregine súıensek, kapıtalızasııa jaǵynan qarjy sektoryndaǵy kóshbasshy Kaspi.kz bolyp otyr. Kompanııanyń naryqtyq quny 7,3 trln teńgege jetip, ózge qarjy uıymdarynan birneshe ese alda. Kaspi.kz búginde KASE alańyndaǵy eń iri úsh kompanııanyń qataryna kiredi, onyń aldynda taý-ken sektoryndaǵy eki alpaýyt tur.
Ekinshi orynda Halyk Bank ornalasqan. Onyń kapıtalızasııasy 3,5 trln teńge kóleminde tirkelgen. Buǵan deıin úzdik úshtikke Freedom Holding Corp. da kirgen edi, alaıda 25 qarashada KASE bul kompanııa boıynsha derekterdi platformadan alyp tastady. Alǵashqy bestik qataryna ForteBank (1,1 trln teńge) jáne Bank SentrKredıt (839,8 mlrd teńge) enedi.
Kapıtalızasııanyń artýy ınvestorlardyń senimin, naryqtyń turaqty damý qarqynyn jáne qarjy uıymdarynyń básekege qabilettiligin kórsetedi. Kóshbasshy kompanııalar ashyqtyq, tehnologııalyq tıimdilik jáne klıentke baǵdarlaý jaǵynan naryqtyń jańa standarttaryn qalyptastyrýda.
Kapıtalızasııa kompanııanyń bırjadaǵy naryqtyq qunyn bildiredi. Bir aksııanyń baǵasy aınalymdaǵy aksııalar sanyna kóbeıtiledi. Bul kórsetkish bıznes kólemin, ınvestorlar senimin jáne kompanııanyń básekelesteri arasyndaǵy ornyn aıqyndaıdy.
Elimizdiń qarjy uıymdaryna sheteldik ınstıtýsıonaldyq ınvestorlardyń qyzyǵýshylyǵy turaqty ósip keledi. Mundaı ınvestorlar qatarynda álemdik hedj-fondar, halyqaralyq bankter jáne iri ınvestısııalyq qurylymdar bar. NASDAQ bırjasynda saýdalanatyn Kaspi.kz jáne Freedom Holding Corp. halyqaralyq naryqta eń tanymal otandyq kompanııalar sanatyna kiredi.
Investorlar qurylymynda aıqyn aıyrmashylyq bar. Kaspi.kz kapıtalynyń 38,98 paıyzy ınstıtýsıonaldyq ınvestorlarǵa tıesili, bul kompanııaǵa degen senimniń joǵary ekenin dáleldeıdi. Freedom Holding Corp. boıynsha bul úles nebári 4,09 paıyz deńgeıinde.
Instıtýsıonaldyq ınvestorlar sany Kaspi.kz boıynsha 207, Freedom Holding Corp. boıynsha 152. Investorlar ıeligindegi aksııa kólemi Kaspi.kz úshin 74,1 mln dana, Freedom Holding Corp. úshin 2,5 mln dana. Aksııalardyń jalpy quny Kaspi.kz boıynsha 5,4 mlrd dollar, al Freedom Holding Corp. boıynsha 345 mln dollar. NASDAQ derekteri ózgerissiz saqtalǵanymen, KASE platformasy Freedom Holding Corp. týraly aqparatty 25 qarashada alyp tastaǵanyn eskergen jón.
Kaspi.kz ınvestorlary arasynda Baring Fintech Manager Holding Ltd, Baillie Gifford and Co, FIL Ltd, Pzena Investment Management LLC, FMR LLC, Sands Capital Management LLC, Schroder Investment Management Group sııaqty álemge áıgili ınvestısııalyq uıymdar bar. Olardyń qatarynda BlackRock Inc, HSBC Holdings Plc, JPMorgan Chase and Co, Goldman Sachs Group Inc, Morgan Stanley syndy jahandyq alpaýyttar da kezdesedi.
Freedom Holding Corp. ınvestorlarynyń alǵashqy qatarynda BlackRock Inc, State Street Corp, Morgan Stanley, Vanguard Group Inc, Bank of America Corp sekildi iri halyqaralyq oıynshylar bar. Alaıda ınvestısııa kólemi boıynsha eki kompanııa arasynda aıyrmashylyq aıtarlyqtaı. Freedom Holding Corp. úshin 10 mln dollardan asatyn úleske ıe ınvestorlar sany jeti ǵana bolsa, Kaspi.kz boıynsha mundaı ınvestorlar sany 59.
Osy derekterge súıensek, eki kompanııa da halyqaralyq deńgeıde úlken nazarǵa ıe. Biraq Kaspi.kz ınstıtýsıonaldyq ınvestorlar úshin anaǵurlym tartymdy bolyp otyr. Bul onyń bıznestiń tehnologııalyq modeli, naryqtaǵy orny jáne turaqty ósim qarqyny boıynsha joǵary baǵalanatynyn kórsetedi.
