ÚEU elimizdiń barlyq óńirinde bar, biraq olardyń sany aımaqtarda ártúrli. 2024 jyly jumys istep turǵan uıymdardyń úshten biri Astana (4,1 myń) men Almatyda (5,3 myń) shoǵyrlanǵan. Sol sebepti ÚEU-ǵa arnalǵan memlekettik áleýmettik tapsyrystyń shamamen 28%-y dál osy eki megapolıske tıesili boldy.
ÚEU jobalaryn qarjylandyrý kólemi boıynsha Almaty alda. О́tken jyly qaladaǵy úkimettik emes sektor 6,1 mlrd teńge kóleminde grant ıgerdi. Aımaqtardyń kópjyldyq qarjylyq dınamıkasy turaqsyz bolǵandyqtan, olardy salystyrý qıyn.
Memlekettik qarjylandyrý kólemi jaǵynan ekinshi orynda Pavlodar oblysy (4,9 mlrd tg) tur. Sondaı-aq úzdik bestikke Astana (3,3 mlrd tg), Qostanaı (3,2 mlrd tg) jáne Aqtóbe (2,3 mlrd tg) oblystary kirdi. Qarjylandyrý kólemindegi aıyrmashylyq óte úlken. Mysaly, Abaı oblysynda ótken jyly azamattyq sektor jobalaryna nebári 330,7 mln teńge bólinse, Mańǵystaýda 348,5 mln teńge, Soltústik Qazaqstanda 420,3 mln teńge bólingen. Bul óńirlerde áleýmettik máseleler az degendi bildirmeıdi.
Jalpy, 2024 jyly memlekettik áleýmettik tapsyrys aıasyndaǵy qarjylandyrý 33,6 mlrd teńgege jetip, bir jylda 25,7%-ǵa, al bes jylda eki esege artty.
USB deregine sáıkes, ótken jyly ÚEU memlekettik tapsyrys aıasynda 2167 joba júzege asyrdy. Grant sany boıynsha kóshbasshy qalalarǵa Qostanaı jáne Pavlodar oblystary kirdi. Jobalardyń 94%-y qysqa merzimdi, ıaǵnı bir jylǵa ǵana josparlanǵan. Uzaqmerzimdi jobalar sany óte az.
ÚEU negizinen memleket ózekti dep tanyǵan áleýmettik máselelermen aınalysady. 2024 jyly barlyq jobanyń shıregi áleýmettik osal toptarǵa qoldaý kórsetýge baǵyttaldy (500 grant). Budan bólek:
-
qoǵamdyq kelisimdi jáne ulttyq birlikti nyǵaıtý – 227 grant;
-
jastar saıasatyn jáne balalar bastamalaryn qoldaý – 219 grant;
-
otbasylyq-demografııalyq jáne genderlik máselelerdi sheshýge járdemdesýge 155 grant bólingen.
Qarasha aıynda Qoǵamdyq damý ınstıtýty (QDI) memlekettik tapsyrys aıasyndaǵy ÚEU áleýmettik jobalarynyń tıimdiligine arnalǵan zertteý nátıjesin jarııalady. Zertteýde ÚEU ókilderi memlekettik tapsyrys kóbine eskirgen, ózektiligi tómen taqyryptar boıynsha jarııalanatynyn aıtqan. Olar ÚEU ekologııalyq máselelerdi, qoǵamdyq ınfraqurylym men TKSh kemshilikterin, jastar arasyndaǵy devıantty minez-qulyqty, mekteptegi býllıngti, halyqtyń quqyqtyq jáne qarjylyq saýatsyzdyǵyn sheshýge kóbirek jumyldyrylýy kerek dep sanaıdy.
