Sýretti túsirgen – Igor BÝRGANDINOV
Baýyr basqan «Egemen Qazaqstan» gazetimen elý jyldan asa syrlaspyn. Hat tasýshy tańerteń kelgenshe asyǵamyn. Qolyma tıgen bette arǵymaqqa úzeńgi salǵandaı qýat alamyn. Basylymdaǵy jas jýrnalısterdiń qalam tartysyna súısinemin. Sózderi salmaqty, ushqyr oı, aldaǵy bolashaqqa degen yntyzar kóńil serpilisin sezinesiń. Sodan soń kópten beri berilip kele jatqan jýrnalıster baǵanyna kóz júgirtip, olardyń talǵampaz oıly qalam siltesine súısinip, qaıtalap oqıtynym bar.
Jaqynda poshta bólimshesine baryp, keler jyldyń baspasózine jazyldym. Gazet quny qymbattapty. Baǵanyń kóterilýi zańdylyq, qazir baspahana, poshta, qaǵaz – bári qymbattap jatyr. Buǵan tańyrqaýǵa bolmaıdy. О́zim «Egemen Qazaqstan» gazetine bir jylǵa jazyldym.
Aldaǵy jyldan kúter úmit kóp. Gazet alystaǵy aýyldardyń tynys-tirshiligin tereńirek qozǵasa degen tilek bar. Elde baıaǵydaı myńǵyrǵan mal joq. Kóp aýyl qańyrap qalyp jatyr. Bilikti mehanızator, shofer ataýly azaıdy, jastardyń bári qalada. Qoly jetkenderi ártúrli jumys isteıdi, basqasy – taksıde. Aýylda kári-qutan ǵana qaldy. Soǵan qaramastan, búginde as, qudaıy, mereıtoıdyń bári básekege aınaldy. Aýylda otyryp, qala ortalyǵyndaǵy meıramhanaǵa tapsyrys berip, jıǵan-tergenin shashady. Osylardy kórip, janyń aýyrady. Aıta berseń, oı, qozǵar taqyryp kóp. Meniń aıtpaǵym – osy sekildi aýyldyń hal-ahýaly súıikti gazetimizde jıi kóterilse degen tilek.
Aǵaıynǵa aıtarym, «Egemen Qazaqstan» gazetine jazylýdy umytpaǵaısyz. Shynaıy yqylasymdy búkpesiz aıtyp, oqyrman qaýymǵa qatardan qalmaı, aldaǵy jylǵa jazylýdy paryz sana degim keledi. Al, sen ne deısiń, janashyr oqyrman?
Qaıyrbek MYRZAHMETULY,
Qazaqstannyń qurmetti jýrnalısi
Qyzylorda
