Oblystyq sanıtarlyq-epıdemıologııalyq baqylaý departamenti basshysy Álııa Bekeshevanyń aıtýynsha, tumaý juqtyrǵandardyń basym bóligi – 14 jasqa deıingi balalar. Maýsymdyq tumaýdyń zerthanalyq rastalǵan 17 jaǵdaıy anyqtalyp otyr. Osy kezge deıin 58 myńnan astam adam vaksına saldyrǵan.
Oblystyq densaýlyq saqtaý basqarmasynyń basshysy Qaısar Abdalıev emhanalarǵa tumaý sımptomymen bir táýlikte 154 adam qabyldaýǵa júgingenin aıtty.
«Stasıonarlarda 209 naýqas jatyr. Em qabyldaýshylardyń arasynda 126 bala men 45 júkti áıel bar. Osyǵan baılanysty óńirde qosymsha shara qabyldandy. Turǵyndardan tumaý belgileri baıqalsa, birden medısınalyq kómekke júgingeni abzal», deıdi Qaısar Abdalıev.
Atyraý oblysyndaǵy medısınalyq mekemelerde 381 ınfeksııalyq tósektik oryn bar. Emhanalardaǵy fıltr kabıneti saǵat 08:00-20:00 aralyǵynda jumys isteıdi. Al mobıldi brıgadalardyń jumys ýaqyty 22:00-ge deıin uzartylyp otyr. Sondaı-aq oblystyq ınfeksııalyq aýrýhanada qosymsha bir dárigerlik beket ashyldy.
Atyraý oblysy
