Indýstrııalyq aımaq 12 gektar jerge salynady. Basqarýshy kompanııa «Ulytaý áleýmettik kásipkerlik korporasııasy» AQ bolmaq. Aýqymdy joba bıyl bastaldy.
Indýstrııalyq aımaqty qurýdaǵy negizgi mindet – qalanyń óndiristik áleýetin arttyrý, jańa óndiris oryndaryn ashyp, Sátbaev qalasy turǵyndaryn jumyspen qamtýǵa serpin berý.
Qazir ınjenerlik-kommýnıkasııalyq ınfraqurylym jumystary bastaldy. Sátbaev qalasy ákimdigi ındýstrııalyq aımaqqa qajetti ınjenerlik-kommýnıkasııalyq ınfraqurylymdy salýǵa arnalǵan úsh jobalaý-smetalyq qujat ázirledi. Onyń ishinde ekeýine JSQ merziminiń ótýine baılanysty túzetý engiziledi.
Qoldanystaǵy «Sátbaev qalasyndaǵy ındýstrııalyq parktiń ınjenerlik-kommýnıkasııalyq ınfraqurylymyn salý» jobasymen Ulytaý oblysynyń qurylys, sáýlet jáne qala qurylysy basqarmasy memlekettik satyp alý konkýrsyn ótkizdi. Nátıjesinde, «Naz» JShS-men 802,4 mln teńge kóleminde shart jasaldy. Qujatta qurylysty 2025 jylǵy qarashadan bastap, 2026 jylǵy maýsymda aıaqtaý josparlanǵan.
Biz ındýstrııalyq aımaqqa bólingen jerde júrgizilip jatqan jumys barysymen tanystyq. Joba aıasynda ındýstrııalyq aımaqqa deıin júrgiziletin elektrmen jabdyqtaý jelileriniń jalpy uzyndyǵy 35 kV (483 m) jáne elektrlik qosalqy stansa 35/6 kV – 1 dana, sý qubyry jelileriniń jalpy uzyndyǵy – 1727,8 m, káriz jelileriniń jalpy uzyndyǵy – 1352,4 m, jylý jelileriniń jalpy uzyndyǵy 482 metr bolmaq.
«Bul aımaqqa 12 gektar jer bólingen, ony 50 gektarǵa deıin ulǵaıtý múmkindigi bar. Basqarýshy kompanııa retinde Ulytaý áleýmettik kásipkerlik korporasııasy belgilendi. Bıyl ınjenerlik – kommýnıkasııalyq ınfraqurylym jelilerin tartý jumystary bastaldy. Qazir «Naz» kompanııasy sýyq sý jelilerin tartý jumystaryn júrgizip jatyr. Indýstrııalyq aımaqtyń basty maqsaty – bizdiń óńirimizge keletin sheteldik jáne otandyq ınvestorlarǵa qolaıly jaǵdaı jasaý. Injenerlik – kommýnıkasııalyq ınfraqurylym memleket esebinen júrgiziledi. Oblystyq, jergilikti bıýdjetten qarjylandyrylady», deıdi Sátbaev qalasy ákiminiń orynbasary Erlan Serikuly.
Bıyl jyl sońyna deıin energııamen, sýmen, jylýmen jabdyqtaý qolǵa alynbaq. Aldymen sýmen jabdyqtaý jumysy bastalǵan. Bul – kelesi jyly da jalǵasyn tabatyn aýyspaly joba sanalady. Sonymen qatar ákimshilik qyzyǵýshylyq tanytqan ınvestorlarmen kelissózder júrgizip jatyr. Osy óńirde nendeı nysandar salynatyny aldaǵy ýaqytta belgili bolady. Injenerlik – kommýnıkasııa-lyq ınfraqurylym qurylysy qarasha aıynda bastaldy. Qurylys jumysy 2026 jyldyń maýsymyna deıin aıaqtalýǵa tıis. Odan keıin eki jobalyq-smetalyq qujattama bar. Ol – jol, temirjol tuıyǵy jáne ony abattandyrý. Osy jumystar da qosa atqarylady. Bul qurylys aldaǵy jyly bastalady.
Indýstrııalyq aımaqtyń ınfraqurylymymen tanysyp kórdik: qýaty 2,9 MVt-ǵa deıin, kerneýi 35 kV-ǵa deıingi energııamen jabdyqtaý, táýligine 57,8 tekshe metr kóleminde sýmen jabdyqtaý, saǵatyna 2,8 Gkal jylýmen jabdyqtaý, táýligine 96 tekshe metr káriz júıesi, uzyndyǵy 145 m jáne 151 m avtokólik kirme joldary, 5 vagonǵa arnalǵan, uzyndyǵy 1,7 km temirjol tuıyǵy keleshekte Sátbaev qalasynyń ıgiligine aınalmaq.
Jumys basynda júrgen merdiger kompanııanyń ókili, osy jobanyń basshysy Jeńishan Batyrhanuly qurylysty mejeli merzimde aıaqtaýǵa kúsh salatynyn jetkizdi. «Bizdiń jumysymyz – qubyr tartý. Osy nysandaǵy ınjenerlik júıe tórt bólikten turady. Atap aıtqanda, elektr qýaty, sý, káriz jáne jylý jelileri. Sý júıesin tartý sharýasyn ortalap qaldyq, jyldyń sońyna deıin aıaqtaımyz. Qalǵan jumysty 2026 jyldyń maýsymyna qaraı tııanaqtaımyz», deıdi J.Batyrhanuly.
Jumys qyzý júrip jatqan aýmaqtaǵy merdiger kompanııa Almaty qalasynan kelgen. Barlyǵy 12 adam jumys istep jatyr. Onyń ishinde nysannyń basshysy, ınjener, brıgadır, jumysshylar, mehanızatorlar bar. Sátbaev qalasy tehnıkamen qamtamasyz etip otyr. Qurylys jumysyna qajetti jabdyqtar qoljetimdi. Ornatyp jatqan qubyrlardy Qaraǵandy oblysynyń Saran qalasynan aldyrǵan.
Indýstrııalyq aımaq Sátbaev qalasynyń óndiristik áleýetin arttyryp, jańa ınvestısııalyq jobalardyń iske asýyna jáne jumys oryndarynyń artýyna múmkindik beredi. Joba óńir ekonomıkasynyń turaqty damýyna ári jańa óndiristerdiń qalyptasýyna serpin bermek.
Ulytaý oblysy
