Foto: istockphoto.com
Oxford Academic saıtynda jarııalanǵan zertteýge sáıkes, aldaǵy 30 jyl ishinde júrek-qan tamyrlary aýrýlarynan bolatyn ólim-jitim 73%-ǵa kóbeıip, 36 mıllıonǵa jetýi múmkin. 2022 jyly bul kórsetkish 19,8 mıllıon adamǵa teń bolyp, álemdegi jalpy ólimniń shamamen úshten birin qurady.
Al, múgedektikke beıimdelgen ómir jyldary (DALY) boıynsha jalpy aýrý júktemesiniń 55%-ǵa ósýi boljanyp otyr. Ásirese, 2-tıpti qant dıabeti bar naýqastar arasynda sozylmaly júrek jetkiliksizdigi basty ólim sebepteriniń biri bolyp sanalady.
Qazaqstanda sońǵy onjyldyqta qan aınalymy júıesi aýrýlarynyń taralýy artqanymen, profılaktıka men kardıologııalyq ortalyqtardy damytý arqasynda standarttalǵan ólim-jitim shamamen 37%-ǵa tómendegen. Bul kórsetkishter kardıologııalyq qyzmettiń tıimdiligin dáleldeıdi.
«Densaýlyq» ulttyq qaýymdastyǵy ZTB basqarma tóraǵasynyń orynbasary, dáriger Gıntaýtas-Iýozas Kentra júrek-qan tamyrlary aýrýlarynyń ósýi dárigerlerdi de, qoǵamdy da alańdatyp otyrǵanyn aıtty. Onyń sózinshe, júrek saýlyǵyn saqtaý jastyq shaqtan bastalýy qajet.
«Salmaqty baqylaý, temekiden bas tartý, dene belsendiligin arttyrý, turaqty tekserýden ótý jáne búırek jaǵdaıyna kóńil bólý – osy sharalar aldaǵy onjyldyqtarda mıllıondaǵan mezgilsiz ólimniń aldyn alýǵa múmkindik beredi», dedi dáriger.
