Redj Spırs sol jyly Anglııaǵa Olımpıada oıyndaryna irikteý jarysyna qatysý úshin barǵan. Sporttaǵy bolashaǵynan úlken úmit kúttirgen jas jigit Anglııada biraz ýaqyt daıyndalǵanymen, jarysqa óte almaıdy. Qaltasynda kók tıyn joq, elge qaıta ushýǵa múmkindigi bolmaǵan Spırs tosyn sheshimge barady. Ol Aýstralııaǵa «avıaposhtamen» oralý josparyn qurady.
Dosynyń kómegimen aǵashtan 150×90×75 santımetr kólemindegi jáshik jasaıdy. Ishine aýa kiretin tesikter, sý men tamaqqa arnalǵan ydys, jyly kıim jáne qaltalyq dáret shelek ornalastyrady. Sóıtip, óz-ózin júk retinde «orap», «aqysyn alǵan kezde tólenedi» (cash on delivery) degen belgimen joldap jiberedi.
Ushý barysynda Spırs birneshe ret jáshikten shyǵyp, aıaq-qolyn jazǵan. Al eń qaýipti sát Bombeıdegi (qazirgi Mýmbaı) aralyq aıaldamada bolypty. Munda júkshiler jáshikti kún astynda birneshe saǵat boıy qaldyrǵan. Onyń ústine Spırs sol sátte jáshik ishinde tóńkerilip, basymen tómen qarap jatqan. Keıin ol bul sátti eske alyp:
«Men tipti esimdi joǵaltyp ala jazdadym. Biraq aman qaldym. Meniń bar maqsatym – úıge jetý edi», dep aıtqan.
Birneshe kúndik aýyr sapardan keıin Spırs Pert qalasyndaǵy áýejaıǵa jetkiziledi. Ol jerde bagaj qoımasyndaǵy qabyrǵany tesip, eshkimge baıqalmaı qashyp shyǵady. Birneshe saǵat ótken soń, erkindikke shyqqan «jolaýshy» eń aldymen dostaryna habarlasyp, óz elinde júrgenin jetkizedi.
Eger Anglııadaǵy kómekshisi únsiz qalǵan bolsa, bul oqıǵa eshkimge beımálim kúıde qalar edi. Alaıda ol Redjten habar ala almaı, mazasyzdanyp, jýrnalısterge bolǵan jaıtty aıtyp beredi. Sol sátten bastap Spırs álemdik sensasııaǵa aınalady. Gazetter ony «adam-poshta», «jáshiktegi saıahatshy» dep atap, fotosyn birinshi betke shyǵarady.
Onyń batyldyǵyna tańdanǵandar kóp boldy. Keıbiri muny erlik dep baǵalasa, endi biri aqymaqtyq pen táýekeldiń shegi dedi.
Redj Spırs keıin de biraz jyl el nazarynda júrdi. Alaıda ol ózin batyr dep sanamaǵan. Bir suhbatynda: «Men jaı ǵana úıge jetkim keldi. Sol sátte basqa amal joq edi», degen bolatyn. Ýaqyt óte kele onyń bul oqıǵasy kóptegen derekti fılm men telebaǵdarlamalarda kórsetilip, erekshe adam tózimdiligi men tapqyrlyqtyń úlgisi retinde aıtylady.
