El ıgiligin eseleýge úles qosqan Dıas Bilálov «Fırma Almaz-Agro» seriktestiginde úshinshi jyl eńbek etedi. Orta arnaýly bilimi bar. Kóptegen aýyl balasy tárizdi tehnıkaǵa degen qumarlyq erte paıda bolǵan. Aldyńǵy tolqyn aǵalarynyń jan aıamaı jumys istep júrgenin kórip, ózi de naq solardaı bolýǵa tyrysqan. Asylynda, aldynan jumys úrkip otyratyn eńbekqor adamdardyń is-qımyly keıingi tolqynǵa jaqsy ónege.
– Bizde ozat jumysshylar óte kóp. Olar ózderine tapsyrylǵan kez kelgen sharýany tap-tuınaqtaı etip oryndaıdy. Mehanızatorlardyń kópshiligi tehnıkanyń túr-túrin tizgindep, jumys isteı beredi, – deıdi Dıas. – Kombaında isteý qyzyq ári qasterli. Kóz aldyńyzǵa elestetip kórińizshi, kúzgi dala, masaqtaǵy dánin ázer kóterip turǵan egin alqaby. Sál ǵana jel kóterilse teńizdeı tolqıdy. Yrys tunǵan, mol dáýletke bókken jomart jer. Eger egistik alqabynda bir tal aramshóp bolmasa toqtamaı shaba bergiń keledi. Qazirgi bizdiń kórsetkishimizge aǵa tolqynnyń sál tańyrqap qaraıtyny bar. Onyń syry belgili. Jańa zamanǵy qýatty tehnıkalardyń eńbek ónimdiligi óte joǵary.
Jańaturmys aýylynyń mańy qarbalasy kóp qońyr kúzde eńbek jyryn shertip turady. Darhan dalany adam kóńilin elegizetin eńbek áýeni terbetken kezde sol joryqqa qatysqan erlerdiń de eńsesi kóterile túsedi.
– Ujym óte uıymshyl. Ár sáti sheshýshi shaqqa aınalǵan kóktemgi egis, kúzgi egin oraǵy kezinde ýaqytpen sanaspaı eńbek etemiz, – deıdi jas kombaınshy. – Mynaý seniń, mynaý meniń jumysym deý joq, bári ortaq. Seriktestik eńbek etýimizge qolaıly jaǵdaı jasap otyr. Eńbekaqymyz tolymdy, ýaqytynda qolymyzǵa tıedi.
Jıyrmadan jańa asqan jas jigittiń el ishinde abyroıǵa bólenýi adal eńbeginiń arqasynda. Alda qanshama ǵumyr bar. Sol jolda qos qolytyǵynan kóterip demeıtin, alǵa umtyldyratyn qudiret – boıyndaǵy adal eńbekke degen umtylysy.
Aqmola oblysy,
Astrahan aýdany
