Foto: Ulttyq bank
Jyldyq ınflıasııa qazanda 12,6% boldy (qyrkúıekte – 12,9%). Azyq-túlik taýarlary baǵasynyń ósýi 13,5%-ǵa (12,7%) jáne azyq-túlikke jatpaıtyn taýarlar baǵasynyń ósýi 11%-ǵa (10,8%) deıin qarqyn aldy. Qyzmetterdegi baǵanyń ósýi retteletin turǵyn úı-kommýnaldyq qyzmetterge baǵanyń ákimshilik tómendeýi saldarynan 12,9%-ǵa (15,3%) deıin baıaýlady. Joǵary ınflıasııalyq dınamıka usynys múmkindiginen júıeli túrde asyp túsetin ornyqty suranys jaǵdaıynda qalyptasady. Tarıftik reformanyń jáne janar-jaǵarmaı (JJM) naryǵyn yryqtandyrý áseriniń baǵalar men ınflıasııalyq kútýlerge taralýy qosymsha áser etip otyr.
«Jekelegen taýar naryqtarynda saqtalyp otyrǵan teńgerimsizdik, ornyqty suranys, ımporttyń qymbattaýy jáne shyǵyndardyń ósýi aıasynda azyq-túlik komponenti burynǵysha ınflıasııaǵa kóptep úles qosty. Servıstik ınflıasııanyń úlesi azaıdy, alaıda baǵanyń ósý qarqyny baıaýlaǵanyna qaramastan mańyzdy kúıinde qalyp otyr. Azyq-túlikke jatpaıtyn ınflıasııada janarmaı men farmasevtıkalyq ónim baǵasynyń ósýi jedeldegeni baıqalady.
Qazanda aılyq ınflıasııa 0,5%-ǵa deıin aıtarlyqtaı baıaýlady, alaıda bazalyq ınflıasııa 1% deńgeıinde – joǵary kúıinde qaldy. Bul bir jylǵa eseptegende 12,2% sáıkes keledi. Sonymen qatar tutyný qorjynyndaǵy taýarlar men qyzmetterdiń shamamen 80%-y 5% targetten joǵary qarqynmen qymbattaıdy. Osynyń bári baǵa qysymynyń ornyqtylyǵy men keń qamtýyn kórsetedi. Bul proınflıasııalyq dınamıka fıskaldyq jáne údemeli kvazıfıskaldyq yntalandyrýdyń, sondaı-aq artqan tutynýshylyq suranystyń áserinen kúsheıedi», delingen UB habarlamasynda.
Ulttyq bank ınflıasııanyń baıaýlaý qarqynyn, ishki suranys reaksııasyn, sondaı-aq Baǵdarlamada jáne Inflıasııany baqylaý, tómendetý boıynsha sharalar kesheninde kózdelgen birlesken sharalardy iske asyrý tıimdiligin baǵalaýdy jalǵastyra bermek.
«Qazirgi ýaqytta Ulttyq bank joǵary ınflıasııalyq kútýlerdi, ornyqty bazalyq ınflıasııany jáne tarıftik reformalardyń keıinge qaldyrylǵan áserin nazarǵa ala otyryp, 2026 jyldyń birinshi jartysynyń sońyna deıin mólsherlemeni tómendetý múmkin bolmaıdy dep sanaıdy. Inflıasııanyń ornyqty baıaýlaý úrdisi qalyptasqanyna senimdilik bolmaǵan jaǵdaıda aqsha-kredıt sharttary qatańdatylýy múmkin», delingen málimdemede.
