Foto: Aqorda
«Aldymyzda turǵan mindettiń bárin sapaly ári júıeli oryndasaq, maqsatymyzǵa jetemiz. Aýyl ómir súrýge qolaıly, eńbek etýge jaıly bolýǵa tıis. Aýyl ákimi osy óte mańyzdy jumystyń basy-qasynda júredi. Búgin ákim Janar Nurmuratqyzy «Taza Qazaqstan» qozǵalysy jóninde óte ózekti másele kóterdi. Oǵan alǵys aıtamyn. Memlekettik saıasatty halyqqa jetkizetin de, eldegi ózgeristerdiń, atqarylyp jatqan aýqymdy jumystyń mán-mańyzyn jan-jaqty túsindiretin de – ákimder. Men Sizderge zor úmit artamyn», dedi Memleket basshysy.
Prezıdent aýyl ákiminiń basty mindetine toqtaldy.
«Ákimniń eń basty mindeti – turǵyndardyń turmys sapasyn arttyrý. Aýyldaǵy aǵaıynnyń ál-aýqaty jaqsarsa, aýyldarymyz da kórkeıedi degen sóz. Sizder aýyldy órkendetý úshin tabandy eńbek etesizder dep senemin. Aýyl halqy elimizdi damytýǵa zor úles qosýda. Men osy sátti paıdalanyp, barlyq aýyl turǵyndaryna zor alǵys aıtamyn.
Memleket árdaıym aýyldy qoldaıdy. Sebebi aýyl – ultymyzdyń ózegi. Aýyldy jańa kózqaraspen, ozyq oımen, jańartylǵan tásildermen birge damytýymyz kerek», dedi Qasym-Jomart Toqaev.
Prezıdent jıynda Úkimetke naqty sharalar qabyldaýdy tapsyrdy.
«Búgingi jıynda aýyl ákimderimen qatar, Úkimet músheleri jáne oblys ákimderi otyr. О́zderińiz bilesizder, men Úkimetke ekonomıkany saýyqtyrý úshin Ulttyq bankpen, Qarjy naryǵyn retteý jáne damytý agenttigimen birlesip, naqty sharalar qabyldaýdy tapsyrdym.
Osyǵan oraı, ótken aptada úsh jylǵa arnalǵan Makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasy qabyldandy. Qujatta kórsetilgen sharalar sapaly ári ýaqtyly oryndalýy kerek. Bul jumysqa oblys ákimderi belsene atsalysýǵa tıis.
Naqty oılastyrylǵan usynystardy Úkimetke engizýge ruqsat beremin. Aldymyzda turǵan basty maqsattar: ekonomıkanyń turaqty, sapaly ósimin qamtamasyz etý qajet, ınflıasııany tómendetip, halyqtyń tabysyn arttyrý arqyly turmys jaǵdaıyn jaqsartý qajet, jeke sektordy damytyp, óndiristi jandandyrý kerek, daıyn ónim eksportyn kóbeıtý qajet», dedi Prezıdent.
Qasym-Jomart Toqaev qazirgi jahandyq ahýalǵa da toqtaldy.
«Memleketimizdiń aldynda áli de kóptegen synaq paıda bolýy múmkin. Qazirgi tańda álemdegi ahýal turaqty emes, keleshegi bulyńǵyr deýge bolady. Keıbir elderdiń egemendigi, jeriniń tutastyǵy áli tolyq sheshilmegen, tipti, bul másele halyqaralyq daýlardyń ózekti taqyrybyna aınaldy. Birikken Ulttar Uıymynyń bedeli álsirep ketti, jahandyq ekonomıka da qubylmaly kúıde.
Sondyqtan bárimiz bir ult bolyp, qyraǵylyqty saqtaýymyz kerek, jas urpaqqa qamqorlyq kórsetip, durys tárbıe berýimiz qajet, ishki daýlardan aýlaq bolyp, yntymaq-birligimizdi nyǵaıtýymyz kerek. Jalpy, bárimizge ortaq asa mańyzdy mindet – el múddesine tıimdi qyzmet etý.
Qazaqstannyń egemendigi, derbestigi, táýelsizdigi – bárinen qymbat. Bul – ultymyzdyń aldynda turǵan eń bıik maqsat.
Men el Prezıdenti retinde bul maqsatty oryndaý úshin barlyq kúsh-jigerimdi salamyn.
Elimiz aman, jurtymyz tynysh bolsyn!
Barshańyzǵa amandyq, tabys tileımin!», dep aıaqtady sózin Qasym-Jomart Toqaev.
Jıynda Parlament Májilisiniń Tóraǵasy Erlan Qoshanov, Premer-mınıstrdiń orynbasary Qanat Bozymbaev, Batys Qazaqstan oblysy Qaratóbe aýdany Qoskól aýyldyq okrýginiń ákimi Ádilet Musaǵalı, Soltústik Qazaqstan oblysy Qyzyljar aýdany Vagýlıno aýyldyq okrýginiń ákimi Irına Shıshkına, Almaty oblysy Talǵar aýdany Nura aýyldyq okrýginiń ákimi Ahmet Orazbaev, Jambyl oblysy Jýaly aýdany Qarasaz aýyldyq okrýginiń ákimi Janar Nurmuratqyzy, Aqtóbe oblysy Mártók aýdany Táńirbergen aýyldyq okrýginiń ákimi Medet Bekjanov, Qostanaı oblysy Qostanaı aýdany Vladımır aýyldyq okrýginiń ákimi Álııa Júnisova, Almaty oblysy Qarasaı aýdany Raıymbek aýyldyq okrýginiń ákimi Erjas Toqtasynov, Abaı oblysy Kókpekti aýdany Shuǵylbaı aýyldyq okrýginiń ákimi Nurlan Nazarhanov sóz sóıledi.
