Foto: Mádenıet jáne aqparat mınıstrligi
Jıyn barysynda 2026 jylǵa arnalǵan TÚRKSOI uıymynyń jumysyn jetildirý boıynsha jumys tobyn qurý týraly sheshim qabyldandy. Sonymen qatar «Aqtaý – Túrki áleminiń mádenı astanasy» jylynyń qorytyndysy shyǵaryldy.
TÚRKSOI elderiniń mádenıet mınıstrleri bas qosqan jıynǵa Mádenıet jáne aqparat mınıstri Aıda Balaeva, TÚRKSOI Bas hatshysy Sultan Raev, Túrikmenstannyń mádenıet mınıstri Atageldy Shamyradov, О́zbekstannyń mádenıet mınıstri Ozodbek Nazarbekov, Ázerbaıjan Mádenıet mınıstriniń orynbasary Mýrad Gýseınov, Qyrǵyzstan Mádenıet, aqparat, sport jáne jastar saıasaty mınıstriniń orynbasary Askaraly Madamınov, Túrkııa Mádenıet jáne týrızm mınıstriniń orynbasary doktor Serdar Cham, sondaı-aq Mańǵystaý oblysy ákiminiń orynbasary Tilegen Ábishev qatysty.
Aıda Balaeva óz sózinde aıtýly jyl aıasynda atqarylǵan sharalardy atap ótti.
Jıynda TÚRKSOI Bas hatshysy Sultan Raev quttyqtaý sóz sóıledi. Ol bıyl uıymnyń uıytqy bolýymen úsh myńnan astam ártis túrli is-sharaǵa qatysyp, júzdegen basylym men sıfrlyq materıal shyǵarylǵanyn tilge tıek etti.
«2025 jyly «Aqtaý – túrki áleminiń mádenı astanasy» jobasyn qoldaǵany úshin Qazaqstan Prezıdenti Qasym-Jomart Toqaevqa shynaıy alǵysymdy bildiremin. Gabalada ótken sammıtte Qazaqstan Prezıdenti sóılegen sózinde bul mártebeniń ortaq mádenı keńistigimiz úshin mańyzyn aıqyndaı tústi. Sonymen qatar bıyl biz tarıhı oqıǵanyń kýási boldyq: memleket basshylary ýaqyt talabyna saı TÚRKSOI-dy nyǵaıtý qajet ekenin atap, Bas hatshylyqqa osy jumysty bastaýdy tapsyrdy. Bul jaı ǵana sheshim emes – túrki álemi elderiniń mádenı yntymaqtastyǵynyń bolashaǵyn aıqyndaıtyn strategııalyq kezeń», dedi Sultan Raev.
Jıyn sońynda Aıda Balaeva 2026 jyly Túrki áleminiń mádenı astanasy mártebesi Ándijan qalasyna beriletin bolǵandyqtan, TÚRKSOI-dyń ýaqytsha úılestirýshisi mindetin ózbekstandyq áriptesi Ozodbek Nazarbekovke tapsyrdy.
Sondaı-aq TÚRKSOI-ǵa múshe elderdiń deklarasııasy qabyldandy.
