«Adal azamat» birtutas tárbıe baǵdarlamasy aıasynda ashylǵan bul keshen bolashaq jastardyń boıyna ulttyq qundylyqtardy qalyptastyrýdy kózdeıdi.
«Etno aýyl» – halqymyzdyń baı dástúrin dáripteıtin, jas urpaqtyń rýhanı-adamgershilik tárbıesin nyǵaıtatyn mádenı orta. Bul keshen kóne ǵuryptarymyz ben buıymdarymyzdy, babalarymyzdyń turmysta qoldanǵan zattaryn qaıta jańǵyrtý maqsatynda ashylǵan.
Keshenniń ashylý saltanatyna oblys ákimdigi bilim basqarmasynyń basshysy Nurbek Orshybekov, Baızaq aýdany ákiminiń orynbasary Rústem Qasymov jáne aýyl turǵyndary men mektep ujymy qatysty. Alǵashqy bolyp sóılegen bilim basqarmasynyń basshysy Nurbek Orshybekov qazaqy dástúrlerdiń qaıta jańǵyrý úrdisine toqtalyp, mundaı keshenderdiń sanyn kóbeıtý kerektigin aıtyp ótti.
– Oblysymyzda «Adal azamat» birtutas tárbıe baǵdarlamasy aıasynda aýqymdy sharalar atqarylyp jatyr. Sonyń birden bir dáleli osy «ETNO – AUYL» kesheni. Bul keshen bolashaq el azamattaryn ultjandylyqqa, otanǵa degen adaldyqqa tárbıeleýge óz úlesin qosady dep senemin. Ár is-sharanyń artynda úlken eńbek jatqany sózsiz. Sol sebepti «jumyla kótergen júk jeńil» dep, osy keshendi ashý jolynda aıanbaı eńbek etken aýyl azamattaryna óz alǵysymdy bildiremin. Sizderdiń adal atqarǵan isterińizdi kórgen búgingi oqýshylar erteńgi kúni mundaı oryndardyń kórkeıý qarynyna úles qosary belgili,– dedi Nurbek Ábýbekuly.
Ári qaraı keshenniń lentasy qıylyp, mektep ujymy rekvızıtterdi tolyq tanystyryp ótti. Sonymen qatar Qazaq tili men ádebıeti pániniń muǵalimi Qarlyǵash Qadyrqyzy men shákirti Aqnıet Ahmat «qundylyqtar» kórmesine saıahat jasady. «О́negeli ájeler» toby «Aýylym» ánin shyrqap, qarııalar án yrǵaǵyna qosyla bılep, sharany kóterińki kóńil-kúıde ótkizdi.
Munan soń mektep oqýshylarynan quralǵan dombyrashylar toby «Erturan» kúıin oryndap, balýandar bel alysyp, oblys jeńimpazy bolyp júrgen oqýshylar asyq atý oıynyn kórsetip, arqan tartý, altybaqan sekildi qazaqy oıyndar da kórinis tapty.
