Kásipkerlik sýbektileri jiberetin negizgi ári eleýli quqyqbuzýshylyqtardyń biri – emıssııalardyń belgilengen lımıtterden asyp ketýi. Mysaly, bıyl Aqsý qalasyndaǵy Aqsý ferroqorytpa zaýyty belgilengen normadan tys shyǵaryndylary úshin 855 mln teńge aıyppul tólegen.
«Sońǵy eki jylda Pavlodar oblysynda ónerkásiptik qaldyqtardy kómýge qatysty ekologııalyq zańnamany buzýdyń birneshe jaǵdaıy tirkeldi. Mundaı quqyqbuzýshylyqtar jıi kezdespeıdi. Deıturǵanmen atalǵan qyzmet túrimen aınalysatyn bıznes sýbektileriniń máselesi qoǵamda keńinen talqylanyp keledi», dep habarlady óńirlik mamandandyrylǵan tabıǵat qorǵaý prokýratýrasynan.
2024 jyly memlekettik organdar tabıǵat qorǵaý zańnamasyn buzýdyń 995 jaǵdaıyn anyqtap, olardyń nátıjeleri boıynsha ákimshilik quqyqbuzýshylyq týraly ister qaralǵan. Jalpy somasy 59 mln teńge aıyppul óndirilgen. Al bıyl mundaı sıpattaǵy zań buzýshylyqtardyń jıilep ketkeni baıqalyp otyr. Jyl basynan 1 015 quqyqbuzýshylyq tirkelip, 891 mln teńgege aıyppuldar salynǵan.
Tabıǵat qorǵaý prokýrorlary saladaǵy tıisti zańnamany buzýdyń eń keń taralǵan túrleri – ań aýlaý jáne balyq aýlaý qaǵıdalaryn buzý ekenin aıtady. Mysaly, bıyl 1 015 quqyqbuzýshylyqtyń 612 jaǵdaıy ańshylyq pen balyq aýlaýǵa qatysty.
2024-2025 jyldar aralyǵynda sheteldik kompanııalar tarapynan tabıǵat qorǵaý zańnamasyn buzý jaǵdaılary tirkelgen joq.
Pavlodar oblysy
