Foto: Atom energııasy jónindegi agenttik
Shara barysynda QR Atom energııasy jónindegi agenttigi men «Qazaqstandyq atom elektr stansııalary» JShS mamandary eldiń elektr energııasyna suranysyn, geologııalyq erekshelikter men ınfraqurylym múmkindikterin eskere otyryp taldaý júrgizdi. Bul zertteýler atom salasyn damytý jónindegi vedomstvoaralyq komıssııada qaralyp, onyń qorytyndysy boıynsha Almaty oblysynyń Jambyl aýdany ekinshi AES salý úshin ońtaıly aımaq retinde usynylǵan.
Tyńdaýda stansııa qurylatyn aýmaqty tańdaýdyń ǵylymı-tájirıbelik negizderi, reaktordyń tehnıkalyq sıpattamalary, qaýipsizdik sharalary jáne joba iske asqanda kútiletin áleýmettik-ekonomıkalyq nátıjeler jóninde jan-jaqty aqparat berildi.
«Qazaqstanda 3+ býyn reaktorlary paıdalanylatyn bolady, onda qaýipsizdik kóp deńgeıli rezervteý, passıvti jáne belsendi qorǵaý júıelerin biriktirý qaǵıdaty boıynsha iske asyrylady. Qazirgi zamanǵy reaktorlardy álemdik qoǵamdastyq ekologııalyq jáne qaýipsiz dep tanydy», dedi QR Atom energııasy jónindegi agenttigi Iаdrolyq energetıka departamentiniń dırektory Gúlmıra Mursalova.
Jobanyń óńir ekonomıkasyna qosatyn úlesi de sóz boldy.
«Ekinshi AES qurylysy jergilikti óndiristi eleýli damytýdy qamtamasyz etip, óńirdegi shaǵyn jáne orta bıznestiń damýy úshin jaǵdaı jasaıdy. Dúnıejúzilik tájirıbe kórsetkendeı, AES-tegi bir jumys orny ekonomıkanyń aralas salalarynda 10 jańa jumys ornyn qurýǵa yqpal etedi», dep atap ótti QR Atom energııasy jónindegi agenttiginiń Qazaqstandyq qamtý departamentiniń dırektory Danııar Janseıtov.
Kópshilik tyńdaýǵa qatysqan aýyl turǵyndary AES qurylysyna qoldaý bildirip, jobanyń óńir ınfraqurylymyn jaqsartýǵa, jumys oryndaryn kóbeıtýge jáne eldegi energııa tapshylyǵyn azaıtýǵa yqpal etetinin jetkizdi.
«Biz ekinshi AES qurylysyn qoldaımyz, óıtkeni ol turǵyndarymyzǵa jańa múmkindikter ashyp, jumys oryndaryn quryp, energııamen qamtamasyz etý máselelerin sheshýge kómektesedi.
Joba ınfraqurylymdy damytýǵa úles qosyp, bolashaq urpaqqa turaqtylyqty qamtamasyz etedi», dep atap ótti Jambyl aýdandyq Qoǵamdyq keńes tóraǵasy Baǵdat Alıev.
Eske sala keteıik, Qazaqstandaǵy alǵashqy atom elektr stansııasyna «Balqash» degen ataý berildi.
