«Qazirgi ýaqytta mundaı jobanyń iske qosylmaǵanyn resmı túrde habarlaımyz. Esterińizge sala keteıik, MÁMS boıynsha tegin tis emdeý kómegi halyqtyń belgili sanattaryna ǵana qoljetimdi. Atap aıtqanda, balalar jedel jáne josparly stomatologııalyq qyzmetterge júgine alady. Olarǵa kúrdeli tisjegini, pýlpıtti jáne perıodontıtti emdeý, tis túbirin plombalaý, tis julý, abssessti ashý, plastıkalyq operasııalar, parodont qaltalaryn sanasııalaý, sondaı-aq aldyn alý sharalary – fıssýralardy germetızasııalaý, remıneralızasııa, mıoterapııa jáne basqa da qyzmetter kiredi», delingen qordyń resmı taratqan aqparatynda.
Negizi MÁMS júıesi boıynsha ortodontııalyq kómekti de alýǵa bolady. Ortodontııalyq kómek jaq-bet aýmaǵynyń týa bitken patologııasy bar balalarǵa, tis-jaq anomalııalary bar az qamtylǵan otbasylardan shyqqan balalarǵa kórsetiledi. Atalǵan qyzmet tizimine ortodont keńesi, týa bitken jaq-bet patologııasy bar balalar úshin ortodontııalyq plastınkany qoldana otyryp, tis-jaq anomalııalaryn túzetý, ortodontııalyq korreksııa, keshendi bastapqy tekserý, tis qalybyn alý, sút jáne turaqty tisterdi tegisteý, sondaı-aq ortopantomografııa kiredi.
Týa bitti jáne júre paıda bolǵan jaq-bet aımaǵynyń deformasııalary bar balalarǵa medısınalyq kómek stomatolog dárigerdiń kórsetilimderi boıynsha ambýlatorııalyq jaǵdaıda nemese stomatologııalyq jáne jaq-bet hırýrgııasy qyzmetterin kórsetetin medısınalyq uıymdarda kórsetiledi. Osy atalǵan qyzmetter MÁMS aıasynda túgel tegin usynylady.
