Bul týrnırdiń tarıhy tereń. «Shyǵys symbaty» dodasy 30 jyldan beri úzdiksiz ótkizilip keledi. Osy ýaqyt ishinde talaı talant tanyldy. Bir kezderi dál osy alańda álemge áıgili reseılik gımnast Alına Kabaeva da óner kórsetken.
«Men ustazdyq etken jyldary 55-ten asa sport sheberin daıyndadym. Qyzdarymnyń kóbi ózderi jattyqtyrýshy bolyp jumys isteıdi. Birqatary Reseıge, jaqyn qalalarǵa ketti. Osylaısha bizdiń sport túri keńinen damyp keledi. Gımnast qyzdarymyz Azıadaǵa baryp, bir kúmis pen eki altyn alyp keldi. Bul bizdiń oblys úshin óte úlken jetistik», deıdi jarystyń negizin qalaýshy Lılııa Kýzmına.
Bıylǵy týrnırge Pavlodar, Abaı, Shyǵys jáne Astana qalasynyń jas sportshylarymen qatar, Reseı, Belorýssııa jáne Malaızııadan komandalar keldi. Sportshylar da, jattyqtyrýshylar da bul dodaǵa erekshe daıyndyqpen kelgen. Symbattylar saıysyna 5 pen 15 jas aralyǵyndaǵy sportshylar qatysyp, úzdikter anyqtaldy.
«Kórkem gımnastıkaǵa balalar óte erte jastan keledi. Sondyqtan, alańda 3 kún boıy tájirıbesi de, deńgeıi de ártúrli sportshylar bir mezette óner kórsetti. Kórsetkish kóńilden shyqty. Kelesi maýsymǵa laıyqty baǵyt-baǵdar aıqyndaldy. Bıylǵy maýsym osymen aıaqtaldy. Kelesi kezeń qańtar aıynda bastalady» dedi oblystyq keshendi mamandandyrylǵan balalar-jasóspirimder olımpıadalyq rezerv sport mektebiniń dırektory Anar Jantasova.
Jarys gala-konsertpen túıindeldi. Ár komanda ózderiniń úzdik bı qoıylymyn kópshilikke usynyp, alań atmosferasyn erekshe kúıge bóledi. Úzdikterdi oblys ákimi Nurymbet Saqtaǵanov marapattady. Aımaq basshysy mundaı jarystar jas gımnasttardyń sheberligin shyńdap, tájirıbe almasýyna múmkindik beretinin atap ótti.
О́skemen
