11 eńbek mıgranty qaladaǵy saýda-oıyn-saýyq ortalyqtarynyń birinde montajdaý jumystaryn júrgizgen. Tekserý barysynda olardyń tıisti ruqsat qujattary joq bolyp shyqty. Quqyq buzýshylar polısııa basqarmasyna jetkizildi.
«Qazaqstan Respýblıkasynyń kóshi-qon zańnamasyn buzǵan shetel azamattary zań aldynda jaýapqa tartylady. Quqyq buzýshylar el aýmaǵynan shyǵarylýy múmkin. Aldaǵy ýaqytta sot sheshim qabyldaıdy. Ustalǵan shetel azamattary Qostanaıǵa osydan birneshe kún kelgeni anyqtaldy», dep habarlady oblystyq PD-nyń baspasóz qyzmeti.
Jergilikti atqarýshy organnyń ruqsatynsyz sheteldik jumys kúshin paıdalanǵan kásipker de ákimshilik jaýapkershilikke tartyldy.
Kóshi-qon qyzmeti basqarmasynyń bastyǵy Qaırat Dútpaevtyń aıtýynsha, jyl basynan beri óńirde kóshi-qon zańyn buzǵan 1500-den asa shetel azamatynyń joly kesilgen.
Qostanaı oblysy
