Foto: atameken.kz
Olqylyqtyń ornyn toltyrady
ShQO Kásipkerler palatasyna shaǵyn jáne orta bıznes ókilderinen túsken ótinishterde máselelerdiń edáýir bóligi zańdyq rásimder men quqyqtardy qorǵaý tetikterin jetkilikti deńgeıde túsinbeýden týyndaıdy eken. Jańa joba osy olqylyqtyń ornyn toltyrýǵa baǵyttalǵan.
«Zańger keńesi» – bul Palata mamandary kúrdeli quqyqtyq taqyryptardy qarapaıym ári túsinikti tilmen túsindiretin, tájirıbeden alynǵan naqty jaǵdaılardy taldaıtyn jáne praktıkalyq usynymdar beretin turaqty jarııalanymdar toptamasy. Nátıjesinde kásipkerler kúndelikti jumysynda paıdalana alatyn quqyqtyq bilim qory qalyptasady.
Azamattyq sot isin júrgizý
Jobanyń alǵashqy materıaly azamattyq sot isin júrgizýdegi jeńildetilgen (jazbasha) is júrgizýge arnalǵan. Bul – kásipkerler sońǵy ýaqytta jıi betpe-bet kelip júrgen ózekti taqyryp.
ShQO Kásipkerler palatasynyń kásipkerlerdiń quqyqtaryn qorǵaý jáne ákimshilik kedergilerdi azaıtý bóliminiń basshysy Arystan Maratov kelesi máselelerge jan-jaqty toqtalady:
- jeńildetilgen is júrgizý degen ne jáne ol qandaı jaǵdaılarda qoldanylady;
- taraptardy shaqyrmaı, isterdi jedel qaraýdyń artyqshylyqtary;
- qandaı daýlar jeńildetilgen tártippen qaralýy múmkin;
- eger sot sheshimi shyǵarylyp, zańdy kúshine ense, kásipker ne isteýi kerek;
- óz quqyqtaryn aldyn ala qorǵaýǵa kómektesetin preventıvti sharalar.
Sońǵy jyldary kásipkerler sot sheshiminiń bar ekenin tek atqarýshylyq is júrgizý kezeńinde, ıaǵnı jeke nemese memlekettik sot oryndaýshylary is qozǵaǵannan keıin ǵana bilip jatatyn jaǵdaılar jıilegen. Ádette mundaı sheshimder taraptardyń qatysýynsyz, dál osy jeńildetilgen (jazbasha) is júrgizý tártibimen qabyldanady.
Joba sheńberinde Palata zańgerleri bul tetiktiń qalaı jumys isteıtinin, sheshimder qandaı merzimde qabyldanatynyn, sottyń taraptardy qalaı habardar etetinin, sondaı-aq kásipkerdiń sot aktisiniń kúshin joıý nemese oǵan shaǵymdaný úshin qandaı zańdy quraldary bar ekenin túsindiredi.
Táýekelderdiń aldyn alýǵa da erekshe nazar aýdarylǵan
Joǵarǵy Sottyń «Sot kabıneti» servısinde tirkelý jáne derekterdi ózektendirý, habarlamalardy baqylaý, sot qujattaryna ýaqtyly áreket etý máseleleri keńinen qarastyrylady.
«Zańger keńesi» jobasynyń basty maqsaty – ShQO kásipkerlerine óz quqyqtaryn saýatty qorǵaýǵa, quqyqtyq táýekelderdi azaıtýǵa jáne memlekettik organdarmen ári kontragenttermen ózara is-qımyldy senimdi túrde qurýǵa kómektesetin praktıkalyq quraldar usyný.
Kásipkerler Palataǵa óz suraqtaryn joldaı alady. Eń ózektileri «Zańger keńesi» jobasynyń shyǵarylymdarynda talqylanady.
