Foto: istockphoto.com
2024 jyldyń qarashasynan 2025 jyldyń naýryzyna deıin sottalýshy S. qyzmetkerlerdiń jeke derekterine qol jetkizgen. Kásipodaq tarapynan materıaldyq kómek kórsetiledi degen jeleýmen jáne basqa da oıdan shyǵarylǵan sebeptermen áriptesterin adastyryp, olardy mıkroqarjy uıymdarynda onlaın beıneverıfıkasııadan ótkizgen.
«Zańǵa qaıshy nıetterinen beıhabar bolǵan mektep qyzmetkerleri oǵan senip, beıneverıfıkasııadan ótip, ózderin kásipodaq kómegin alý rásimine qatysyp jatyrmyz dep oılaǵan. Keıin maquldanǵan nesıeler S.-nyń bank shotyna aýdarylǵan. Alynǵan qarajattyń az ǵana bóligi materıaldyq kómek retinde qyzmetkerlerge berilip, qalǵan somany ol óz qalaýynsha jumsaǵan. Qylmystyq áreketter nátıjesinde S. mıkroqarjy uıymdaryna jalpy somasy 3,6 mıllıon teńgeden astam materıaldyq zalal keltirgen. Sotta S. kinásin tolyq moıyndap, jasaǵan isine ókinish bildirdi», delingen Sot habarlamasynda.
Istiń mán-jaıyn, jasalǵan áreketterdiń qoǵamdyq qaýiptilik deńgeıin, sottalýshynyń jeke basyn jáne jábirlenýshilerge keltirilgen materıaldyq zalaldyń bir bóliginiń ótelgenin eskere otyryp, sot S.-ǵa 3 jyl 6 aı merzimge bostandyǵyn shekteý, jazanyń búkil merzimine probasııalyq baqylaý belgileý jáne 5 jylǵa kásipodaq tóraıymy laýazymyn atqarý quqyǵynan aıyrý túrindegi jaza taǵaıyndady.
«Konstıtýsııanyń 30 jyldyǵyna baılanysty amnıstııa týraly» Zańnyń 3-baby 4-tarmaǵyna sáıkes, sottalýshynyń jaza merzimi qysqartylyp, 2 jyl 9 aı 18 kún bostandyǵyn shekteý túrindegi jaza túpkilikti belgilendi.
Jábirlenýshilerdiń azamattyq talap-aryzdary qanaǵattandyryldy. Úkim zańdy kúshine endi.
