2025 jyldyń birinshi jartyjyldyǵynda 5 jasqa tolǵan 7 340 qazaqstandyq bala memleket tarapynan qoldaý aldy. Olardyń Otbasy bankindegi «AQYL» bilim berý depozıtterine jalpy somasy 1,7 mlrd teńge bolatyn bastapqy bilim berý kapıtaly aýdaryldy.
Sonyń ishinde 23 bala jetim balalar men ata-anasynyń qamqorlyǵynsyz qalǵan balalar retinde 471 840 teńgeden aldy.
Bastapqy kapıtal aldaǵy ýaqytta balalarǵa armandaǵan mamandyǵyna aparar joldy bastaýǵa kómektesedi. Qarajat saqtalyp, balańyzdyń bolashaǵyna jumys isteýi úshin qarapaıym, biraq mindetti shartty umytpaý mańyzdy. Balanyń kámelet jasyna tolǵanyna deıin nemese bilim berý uıymyna oqýǵa túskenge deıin «AQYL» depozıtin jyl saıyn tolyqtyryp otyrý qajet.
2025 jyly bilim berý depozıtine eń tómengi jyl saıynǵy jarna mólsheri:
- 24 AEK nemese 94 368 teńge – barlyq balalar úshin;
- 12 AEK nemese 47 184 teńge – áleýmettik osal sanattaǵy balalar úshin;
- 0 teńge – jetim balalar men ata-anasynyń qamqorlyǵynsyz qalǵan balalar úshin.
Jarnany bir rettik tolyq soma retinde de, bólip-bólip te salýǵa bolady – bastysy, ol 2025 jyldyń 31 jeltoqsanyna deıin engizilýi tıis.
Eger jyl qorytyndysy boıynsha qajetti soma tolyq tólenbese, memleket bólgen bastapqy kapıtal bıýdjetke qaıtarylady.
2025 jyldyń ekinshi jartyjyldyǵynda 5 jasqa tolatyn balalarǵa qarajat 2026 jyldyń aqpan aıynda aýdarylady.
«Keleshek» baǵdarlamasy aıasyndaǵy bastapqy bilim berý kapıtaly tek «AQYL» bilim berý depozıtterine ǵana jáne aǵymdaǵy jyly 5 jasqa tolatyn balalarǵa ǵana esepteledi. Mysaly, eger bala 5 jasqa eki jyldan keıin, ıaǵnı 2027 jyly tolatyn bolsa, bastapqy bilim berý kapıtaly 2027 jyly aýdarylady.
«AQYL» – bilim alýǵa ketetin shyǵyndarǵa aldyn ala jáne eń az qarjylyq júktememen daıyndalýǵa múmkindik beretin qural. Ol Qazaqstanda da, shetelde de bilim alýǵa arnalǵan. Depozıt neǵurlym erterek ashylsa, jeke jınaqtarǵa banktiń syıaqysy men memlekettik syılyqaqysy soǵurlym erterek eseptele bastaıdy.
«AQYL»:
- Syıaqy mólsherlemesi – 14,9 %;
- Memlekettik syılyqaqy: salymshylardyń barlyq sanattary úshin – 5%. Al jetim balalarǵa, ata-anasynyń qamqorlyǵynsyz qalǵan balalarǵa, múmkindigi shekteýli balalarǵa, kópbalaly jáne az qamtylǵan otbasylardaǵy balalarǵa – 7%;
- Depozıt ashý kezindegi mindetti bastapqy jarna mólsheri – 3 AEK.
